«Aýyl» partııasynyń ókilderi aýyl halqynyń ómirin jaqsartý máselesin talqylady

ÓSKEMEN. QazAqparat – Óskemen qalasynda «Aýyl» Halyqtyq- demokratııalyq patrıottyq partııasynyń Shyǵys Qazaqstan oblysy boıynsha fılıalynyń aktıvi ShQO ekonomıka jáne bıýdjettik josparlaý basqarmasynyń basshylyǵymen kezdesip, «Aýyl-El besigi» memlekettik baǵdarlamasynyń júzege asyrylý barysyn talqylady, dep habarlaıdy QazAqparat tilshisi.

«Aýyl-El besigi» memlekettik baǵdarlamasy qabyldanǵaly «Aýyl» partııasynyń ókilderi onyń óńirlerde júzege asyrylýy boıynsha túrli deńgeılerdegi talqylaýlarǵa belsendi túrde qatysyp, óz usynystaryn bildirýde. Partııanyń aýyl-aımaqtardaǵy músheleri men belsendilerinen kelip túsken usynystar partııaishilik jumys toptarynda talqylanyp, jergilikti quzyrly memlekettik organdarǵa joldanady. Ásirese «Aýyl-El besigi» baǵdarlamasynyń aýyldyq jerlerdiń ınfrastrýktýrasyn damytýǵa qatysty tustary «Aýyl» partııasynyń jiti nazarynda.

Óskemen qalasynda ótken jıyn barysynda «Aýyl» HDPP Shyǵys Qazaqstan oblysy boıynsha fılıalynyń tóraǵasy, oblystyq máslıhat depýtaty Farıd Ábitaev atalǵan baǵdarlamanyń Shyǵys Qazaqstan óńirinde iske asyrylýy boıynsha óz pikirin bildirip, baǵdarlamany aýyl halqynyń ıgiligine jumys istetý baǵytynda utymdy usynystaryn aıtty.

Onyń oıynsha, osyndaı memlekettik baǵdarlamalar joǵary deńgeıde júzege asyrylsa, aýyldaǵy turǵyndardyń ómir súrý sapasyn áldeqaıda jaqsartýǵa múmkindik bar.

«Osy rette, eń ózekti máselelerdiń biri – agrarlyq sala. Qaldyqtardy jınaýǵa qatysty jańashyldyqtan keıin motorly aýylsharýashylyq tehnıkalarynyń baǵasy kúrt ósip ketti. Mysaly traktor men kombaındardyń baǵasy 10-nan 16 mıllıon teńgege deıin qymbattaǵan. Bul shara erte júzege asyryldy jáne ekonomıkalyq turǵyda tıimsiz dep sanaımyz. Meniń oıymsha, bul sheshimdi kem degende eki jylǵa shegerý kerek», - dedi Farıd Ábitaev.

Búgingi talqylaýdyń qortyndysy boıynsha «Aýyl» partııasy Shyǵys Qazaqstan oblystyq fılıaly saıası keńes Prezıdıýmynan «Aýyl-El besigi» memlekettik baǵdarlamasynyń iske asyrylýyna jaýapty quzyretti organdar men oblys ákiminiń atyna tıisti usynystar joldamaq.