«Aýyl» partııasynyń músheleri memlekettik nagradalarmen marapattaldy

NUR-SULTAN. QazAqparat – Búgin elordada «Aýyl» partııasy Táýelsizdik merekesi qarsańynda Eńbek ozattarynyń V forýmyn ótkizdi. Іs-shara barysynda partııa músheleri memlekettik, vedomstvolyq jáne merekelik nagradalarmen marapattaldy, dep habarlaıdy QazAqparat tilshisi.

«Aýyl» halyqtyq-demokratııalyq patrıottyq partııasynyń tóraǵasy – Senat depýtaty Álı Bektaevtyń atap ótýinshe, Eńbek ozattarynyń forýmy – bul partııa jyl saıyn ótkizetin dástúrli is-sharalardyń biri. Jıynda elimizdiń damýyna aıryqsha eńbegi sińgen, memlekettik jáne vedomstvolyq nagradalarmen marapattalǵan partııalastarǵa erekshe qurmet kórsetiledi.

«Biz eńbek adamynyń mártebesin kóterýimiz qajet. Qoǵam ishinde jumysshy mamandyqtara oń kózqaras qalyptastyryp, aýyl eńbekkerleriniń dárejesin asqaqtatýymyz kerek. Elde eńbek adamy tanymal bolyp, oǵan ózindik oryn belgilenýi tıis dep esepteımiz. Eńbekqor jandardy joǵary jalaqymen, nagradalarmen jáne kóptegen jeńildik berý arqyly yntalandyrýǵa mindettimiz. Biz «Aýyl» partııasy retinde eńbek adamynyń dańqyn asqaqtatý boıynsha ártúrli bastamalarǵa arqaý bolýymyz kerek, - dedi partııa basshysy.

Sonymen forým barysynda Egemendiktiń 30 jyldyq mereıtoıy qarsańynda partııanyń

139 múshesine nagradalar tabystaldy. Atap aıtqanda, «QR Zańnama jáne quqyqtyq aqparat ınstıtýty» TMK dırektory Serkebaı Erejepov, «Qurmet» ordenimen, «Baqdáýlet» ShQ dırektory Jarqynbek Bólendın, «Qostanaı-astyq» aýyl sharýashylyǵy kooperatıviniń tóraǵasy Vladımır Dranchýk «Eren eńbegi úshin» medalimen, «Súleımen» óndiristik kooperatıvi basshysynyń orynbasary Qaırat Kelesiuly men «Plamıa» sharýa qojalyǵynyń jetekshisi Evgenıı Ryjkov «Shapaǵat» medalimen marapattaldy. «Olja» sharýa qojalyǵynyń jetekshisi Bolat Bógetovke Qazaqstan Respýblıkasynyń Qurmet gramotasy tabystaldy.

Munan bólek partııanyń 40 múshesine el Táýelsizdiginiń 30 jyldyǵyna arnalǵan merekelik medal berildi.