«Aýyl» partııasynyń quramy ózgerdi

ASTANA. QazAqparat - Astanada «Aýyl» xalyqtyq-demokratııalyq patrıottyq partııasynyń kezekten tys XIV sezi ótti. Kún tártibinde prezıdıým quramyna ózgeris engizý máselesi de boldy, dep xabarlaıdy QazAqparat tilshisi.

Atap aıtqanda, «Aýyl» HDPP-nyń Saıası keńesi Prezıdıýmynyń quramynan Batys Qazaqstan oblysy boıynsha fılıaldyń burynǵy tóraǵasy Amangeldi Baıanov pen «EXPO&Women» uıymynyń basshysy Saltanat Raxymbekovany shyǵarý, al ortalyq apparattyń jetekshisi Qýanysh Seıitjanov pen BQO fılıalynyń qazirgi tóraǵasy Mynataýbıik Ánesovty qabyldaý týraly sheshim bar. Partııa músheleri atalǵan sheshimdi biraýyzdan qabyldady.

Budan bólek, sezd kezinde partııanyń jańa redaktsııadaǵy Jarǵysy qabyldandy. Túrkistan oblysynyń qurylýyna baılanysty «Aýyl» HDPP-nyń Shymkent qalalyq fılıalyn jáne Túrkistan oblystyq fılıalyn ashý týraly sheshim shyǵaryldy. Al Ortalyq apparattyń meken-jaıy Astana qalasy, Esil aýdany, Almaty kóshesi, 1 bolyp ózgertildi.  

«Erteń, 1 jeltoqsan - Qazaqstan Respýblıkasynyń Tuńǵysh Prezıdenti kúni. Partııamyzdyń joǵarǵy basqarýshy organynyń búgingi jıyny osynaý ulyq merekemen tuspa-tus kelýi biz úshin úlken sımvolıkalyq máni bar. Qurylǵan kúnnen bastap Elbasynyń eldik jolyndaǵy árbir bastamasyn qoldap, salıqaly saıasatynyń júıeli jaqtaýshysy bolyp kele jatqan «Aýyl» partııasy bolashaqta da el múddesi úshin mejelegen saıası baǵdarynan aýytqymaq emes», - deıdi partııa basshysy Álı Bektaev. 

Aıta keteıik, partııa tóraǵasy óz baıandamasynda aýyldyń birneshe problemasyn kóterdi. Sonyń ishinde «Bolashaq» baǵdarlamasy boıynsha aýyl jastaryna jeńildik berý máselesi bar.