«Aýyl» partııasynyń kezekten tys sezi ótti

ASTANA. QazAqparat - Elordada «Aýyl» Halyqtyq-demokratııalyq patrıottyq partııasynyń kezekten tys HHІ sezi ótti. Sharaǵa partııanyń 20 fılıalynda ótken kezekten tys konferentsııalarda saılanǵan barlyq delegattary qatysty.

Elimizde bastalǵan Konstıtýtsııalyq reformalar men saıası ózgeristerge baılanysty birneshe konstıtýtsııalyq zańdar qabyldandy. Sonyń ishinde «QR Saılaý týraly» konstıtýtsııalyq zańǵa ózerister engizýine baılanysty partııanyń Jarǵysyna da tıisti ózgerister men tolyqtyrýlar engizý máselesi talqyǵa salyndy.

Memleket basshysy Qasym-Jomart Toqaev bastamashysy bolǵan eldegi Konstıtýtsııalyq reformalar men betburystar respýblıkanyń saıası ómirine aýqymdy ózgerister ákeldi. Elde partııalarǵa degen kózqaras ózgerdi. Partııalar, azamattyq qoǵam buǵan deıingi boıkúıezdikten arylyp, jumystaryn jandandyryp jatyr. Zaman talaby ózgerip, semip qalǵan saıasat tamyryna qaıta qan júgirdi. Soǵan baılanysty partııa óziniń negizgi quqyqtyq qujaty – Jarǵyny jetildirý boıynsha másele kóterip, sezd shaqyrtty.​​​​

«Saılaý júıesi de ózgerip jatyr. Jaqynda ǵana Prezıdent saılaýy ótti. Jańa merzimge saılanǵan Prezıdent aldaǵy ýaqytta soǵan sáıkes parlament qaıta saılanatynyn aıtty. Ol memleket basshysy usynǵan aralas saılaý júıesimen, ıaǵnı, Májilistiń depýtattyq korpýsynyń 70%-y – proportsıonaldyq, 30%-y – majorıtarlyq tásilmen jasaqtalatyn bolady. Bul júıe oblystar men respýblıkalyq mańyzy bar qalalardaǵy máslıhattarǵa da engiziledi. Al aýdandar men qalalardaǵy saılaý tek majorıtarlyq tásilmen ótetin bolady. Soǵan baılanysty budan bylaı fılıaldarǵa, bastaýysh partııa uıymdaryna óńirlerdegi saıası uıym retinde talap kúsheıedi. Osy ózgeristerge Jarǵyny sáıkestendirý maqsatynda oǵan tolyqtyrýlar men ózgertýler engizilip jatyr», – dedi «Aýyl» partııasynyń tóraǵasy Álı Bektaev.

Bul ózgerister jergilikti jerde básekeli saıası orta qalyptastyryp, eldiń aldynda bedeldi, jańa tulǵalardyń saıasatqa kelýine jol ashpaq. Negizgi elektoraty aýyldy jerlerde turatyn «Aýyl» partııasy aýyl múddesi taǵy nazardan tys qalmaýy úshin qazirden qam jasap jatyr.

Sonymen qatar sezd barysynda partııanyń Saıası keńesiniń quramyna ózgerister engizildi. «Qazaqstan fermerleri qaýymdastyǵy» respýblıkalyq qoǵamdyq birlestiginiń basqarma tóraǵasy Daırabaev J.M. pen partııanyń Ortalyq apparat jetekshisi Janataev E.ıA. partııanyń Saıası Keńesi men Prezıdıým músheligine saılandy.