«Aýyl» partııasy jergilikti ózin-ózi basqarýdaǵy máselelerdi talqylady

QARAǴANDY. QazAqparat - Búgin «Aýyl» halyqtyq-demokratııalyq patrıottyq partııasy Qaraǵandy oblysy boıynsha fılıalynyń uıymdastyrýymen «Jergilikti ózin-ózi basqarýda qoǵamdyq uıymdar men saıası partııalardyń róli» taqyrybynda vıdeokonferentsııa ótkizildi, dep habarlaıdy QazAqparat.

Partııa músheleriniń aıtýynsha, demokratııalyq qoǵamda jergilikti ózin-ózi basqarýǵa tek memlekettik organdar ǵana emes, qoǵamdyq uıymdar men saıası partııalardyń da tolyqqandy qatysýyn qamtamasyz etý asa mańyzdy. Jergilikti jerlerde ózin-ózi basqarý júıesine kóptegen mindetter júkteledi. Ol – jergilikti bıýdjetti qalyptastyrý, aýyl sharýashyǵy jerlerin bólý nemese qaıtaryp alý, eldi mekenderdi abattandyrý, jaıylymdardy qalyptastyrýǵa atsalysý. Osy mańyzdy máselelerdi sheshýge qoǵamdyq uıymdar men partııa ókilderin qatystyrý óte mańyzdy. Bul turǵyda qoǵamdyq uıymdar men memlekettik organdardyń qarym-qatynasynyń zańdyq negizderin jetildirý máseleleri de ózekti.

Vıdeokonferentsııa barysynda jergilikti ózin-ózi basqarý máselesinde turǵyndardyń quqyqtyq saýattylyǵy men óz quqyqtaryn jetik bilýleri týraly máseleler talqylandy. Ásirese aýyldyq eldi mekenderdegi turǵyndardyń qoǵamdyq uıymdar men saıası partııalar arqyly jergilikti ózin-ózi basqarý úderisine atsalysýy máselesi saraptalyp, azamattardyń belsendiligin arttyrý baǵytynda atqarylatyn is-sharalar pysyqtaldy.

«Aýyl» halyqtyq-demokratııalyq patrıottyq partııasy Qaraǵandy oblysy boıynsha fılıalynyń tóraǵasy, oblystyq máslıhat depýtaty Serǵazy Ádikenov qazirgi tańda azamattardyń, ásirese aýyl turǵyndarynyń quqyqtyq saýattylyǵyn arttyrý óte mańyzdy ekenin atap ótti. Onyń aıtýynsha qazirgi tańda «Aýyl» partııasynyń aýdandar men aýyldyq eldi mekenderdegi belsendileri qoǵamdyq keńester men jergilikti uıymdardyń qataryna kóptep tartylýda. Sonymen qatar, ol jergilikti ózin-ózi basqarý úderisine tıisti deńgeıde qatysý úshin «Aýyl» partııasynyń aýdandyq bastaýysh partııa uıymdarynyń áleýeti jetkilikti ekendigin jáne bul baǵytta partııa barlyq aımaqtarda keshendi is-sharalar atqaryp jatqanyn jetkizdi.

«Konferentsııa jumysyna «Aýyl» partııasynyń aýyldyq aımaqtardaǵy ókilderi men belsendi músheleri vıdeo-konferentsııa júıesinde onlaın rejımde qatysty. Oflaın rejımindegi úlgide qatysýshylar arasynda barlyq sanıtarlyq-epıdemıologııalyq talaptar saqtaldy», - delingen aqparatta.