«Aýyl» partııasy jalpyulttyq saýalnama ótkizedi
«El amanaty» jalpyulttyq saýalnamasy Qazaqstannyń aýmaǵynda ótkiziledi. Saýalnamaǵa Qazaqstan Respýblıkasynyń 18 jasqa tolǵan azamattarynan qoǵamdaǵy saıası-áleýmettik jáne ekonomıkalyq máselelerdi jınaqtap, olardy sheshý joldaryn aıqyndaýǵa baǵyttalǵan. Jalpyulttyq saýalnamanyń negizgi maqsattary – árbir azamattyń múddesin qorǵaý, qoǵamdaǵy ózekti máselelerdi anyqtap, tıisti úkimettik organdarǵa jetkizý, elimizdiń damýy boıynsha turǵyndarmen pikir almasý, el turǵyndarymen tyǵyz baılanys ornatý, saýalnama uıymdastyrý arqyly Qazaqstan Respýblıkasynyń árbir azamatynyń qoǵamymyzdy damytýdaǵy ózindik úlesin qosýyna múmkindik berý, qoǵam ómirindegi «Aýyl» partııasynyń saıasatyn qalyptastyrý úshin ózekti de naqty usynystardy el turǵyndarynan jınaqtaý», - dedi partııanyń ortalyq apparatynyń jetekshisi Qýanysh Seıitjanov partııanyń astanada ótken saıası keńesiniń otyrysynda.
Ol sondaı-aq jalpyulttyq saýalnamany ótkizý sharttary týraly sóz qozǵady. Qýanysh Seıitjanovtyń aıtýynsha, saýalnama 2020 jyldyń 23 qyrkúıeginen 25 qazanyna deıin Qazaqstannyń barlyq óńirinde júrgiziledi. Oǵan qatysý-qatyspaý – árkimniń óz erki.
«Túrkistan qalasynda «El amanaty» respýblıkalyq shtaby qurylady. Shtab joba aıasynda halyqpen tikeleı jumys istep, dástúrli saýalnamanyń júrgizilýine monıtorıng jasap, kúndelikti esep berip otyrady. Jalpyulttyq saýalnamany ótkizý sharttary «Aýyl» partııasynyń saıası keńesinde bekitiledi. Saýalnamany ótkizý joldary: birinshiden, esikten esikke úlgisimen dástúrli túrde, ekinshiden Facebook, Instagram áleýmettik jelileri arqyly, úshinshiden WhatsApp jáne Telegram qosymshalary arqyly ótkiziledi», - dedi ol.
Onyń aıtýynsha, saýalnamada QR Konstıtýtsııasynyń qurylymyn ózgertýge, onyń tutastyǵyn buzýǵa, memlekettiń qaýipsizdigine nuqsan keltirýge, áleýmettik, násildik, ultyq, dinı, tektik, rýlyq, toptyq arazdyqtardy qozdyrýǵa baǵyttalǵan saýaldarǵa oryn berilmeıdi.
Saýalnamanyń elektrondy platformasy – «Aýyl» partııasynyń Google Forms servısi.
