«Aýyl» partııasy Úkimette otbasylyq qundylyqtar tujyrymdamasyn tanystyrady
«Aýyl» partııasy áleýmettik saladaǵy mańyzdy máselelerdi jıi kóterip júr. Kópshilik qadamdardyń iske asýyna sebepshi bolýdamyz. Sondyqtan búgin taǵy bir mańyzdy taqyrypty talqylaý úshin jınalyp otyrmyz. Partııanyń bastamasymen jaqynda ǵana Túrkistan qalasyna baryp, ulttyq qundylyqtarymyzdy damytý jóninde jańa tujyrymdamany usyndyq. Biz ulttyq qundylyqtar týraly kóp aıtamyz, biraq osy qundylyqtardyń kóptegen mańyzdy máseleleri shette qalyp ketedi. Sonyń biri – ol otbasylyq qundylyqtar. Jaqynda ony sarapshylarmen talqylap, Úkimetke usynamyz degen jospar bar», - dedi Senat depýtaty, «Aýyl» partııasynyń tóraǵasy Álı Bektaev «Ana men balany áleýmettik qoldaý: zamanaýı talaptar men jańa tásilder» atty dóńgelek ústel otyrysynda.
Sonymen qatar ol áleýmettik saladaǵy qujattarǵa toqtaldy.
«Tikeleı adamnyń densaýlyǵyna, turmys-tirshiligine baılanysty baǵyt – ol áleýmettik qorǵaý máseleleri. Áleýmettik qorǵaý – turmysy tómen, múmkindigi shekteýli jandarǵa, kópbalaly analarǵa kórsetiletin járdem. Sonyń barlyǵy memleketimizde qanshalyqty durys uıymdastyrylyp jatyr? Memleket tarapynan qomaqty qarajat bólinip jatyr, ıaǵnı áleýmettik salanyń úlesi basym. Osy jıyn aldynda tıisti taldaý jasadyq. Bizde áleýmettik qorǵaý máseleleri boıynsha 14 zań bar eken. Onyń bárin bir ǵana zańmen retteýge bolady. Analarǵa beriletin járdemaqy bólek, múmkindigi shekteýli adamdarǵa jeke, ardagerlerge beriletin járdemaqy basqa zańmen qamtylǵan. Atalǵan zańdarǵa tıisti normatıvtik qujattar bar. Onyń barlyǵyn qarap shyqsaq, joǵary bilimi bar adamdardyń ózi de anyq-qanyǵyna jetýi qıyn», - dedi senator.
«Osy máselelerdiń barlyǵyn irikteıtin jańa saıasat kerek degen oımen «Aýyl» partııasy bul baǵytqa mán berip otyr. Biz «El amanaty» degen jalpyulttyq saýalnamany bastadyq. Oǵan áleýmettik qorǵaý, ana men bala máselesin qostyq. Ondaǵy maqsatymyz – eldegi problemalardy shyǵaryp, halyqtyń oı-pikirin bilip, osy baǵytta jumys isteý», - dedi Álı Bektaev.
Belgili bolǵandaı, elimizdegi áleýmettik saıasat, aýyl sharýashylyǵyn damytý boıynsha da partııalyq tujyrymdamany qabyldaý josparlanýda. Dóńgelek ústel otyrysyna qatysýshylar memlekettik organdarǵa balany týǵannan bastap 18 jasqa tolǵanǵa deıin áleýmettik qoldaýdyń biryńǵaı standartyn anyqtaýdy usyndy.
