«Aýyl» partııasy túrli saladaǵy eńbek ozattaryn marapattady
«Eńbek adamy – el tiregi» áleýmettik bastamasynyń qorytyndysyna arnalǵan saltanatty sharada aýyl sharýashylyǵy, bilim berý, densaýlyq saqtaý, ónerkásip, mádenıet, sport jáne basqa da salalardy damytýǵa eleýli úles qosqan partııa músheleri memlekettik jáne vedomstvolyq nagradalarmen marapattaldy.
«Sońǵy 4 jylda «Aýyl» partııasy ár jyldy qorytyndylap, partııa múshelerine, eńbek ozattaryna túrli vedomtsvolyq marapattar men partııanyń nagradalaryn tabystap júr. Ol óziniń jemisin de berip jatyr, jyldan-jylǵa eńbek ozattarynyń, ásirese jastardyń qatary kóbeıip keledi. Sondyqtan, osynyń bárin eskere otyryp, sońǵy eki jylda óz «Eńbek adamy – el tiregi» bastamasyn kóterdik. Sebebi, bizdiń ekonomıkany kóterý máselesin aıtqanda eńbek adamy birinshi orynda turýy kerek. Ekonomıkany kóterip, óndiristi damytyp jatqan da – eńbek adamy, stanoktyń basynda turǵan, traktor, kombaın aıdap júrgen, mal baǵyp júrgen, astyq-kókónis egip júrgen eńbek adamdarynyń arqasynda bizdiń ekonomıkamyz damyp, turaqty túrde saqtalyp otyr», - dep atap ótti «Aýyl» partııasynyń tóraǵasy Álı Bektaev.
«Pandemııaǵa baılanysty kóp adam jınaı almaı otyrmyz, sanıtarlyq talaptardy saqtaýǵa týra keldi. Bıyl 2020 jyldyń qorytyndysy boıynsha túrli salada eńbek etken 122 adamdy túrli nagradalarǵa usynyp, sony sizderge tapsyrǵaly otyrmyz. Olardyń barlyǵy – «Aýyl» partııasynyń músheleri. Barlyq óńirlerde ózderińiz sııaqty eńbek ozattaryn shaqyryp, fılıal tóraǵalary marapattap jatyr. Sondyqtan, bul jumys ári de jalǵasady», - deıdi Á. Bektaev.
Aıta keteıik, «Eńbek adamy – el tiregi» bastamasy aıasynda sońǵy tórt jylda «Aýyl» partııasynyń 700-ge jýyq múshesi memlekettik jáne vedomstvolyq nagradalarmen marapattaldy, onyń 30 paıyzǵa jýyǵy – eńbek ardagerleri. 2020 jyly partııanyń bes múshesi «Qurmet», «Eren eńbegi úshin», «Shapaǵat» memlekettik nagradalarynyń ıesi atandy jáne 117 partııa múshesi mınıstrlikterdiń vedomstvolyq nagradalarymen marapattaldy.
Búgin partııanyń barlyq fılıaldarynda «Eńbek adamy – el tiregi» áleýmettik bastamasynyń jyldyq qorytyndysy shyǵarylyp, marapattaý rásimderi ótedi.
