«Aýyl» partııasy saılaýaldy baǵdarlamasyn baspasózde jarııalaıdy
«Biz saılaýaldy baǵdarlamamyzdy aldymen respýblıkalyq gazetterde jarııalaımyz. Odan keıin, buqaralyq aqparat quraldary ishinde telearnaǵa kandıdatymyz óziniń saılaýaldy baǵdarlamasymen erteń shyǵatyn bolady. Bizdiń oıymyzsha, osy saılaýaldy úgit-nasıhat bastalǵannan keıin shamamen on kúnniń ishinde buqaralyq aqparat quraldary arqyly halyqqa jarııalaımyz. Biraq búgingi tańda saılaýaldy baǵdarlama broshıýra úlgisinde daıyn. Erteń ózimizdiń saıtymyzda da negizgi baǵyttary jarııalanatyn bolady», - dedi Á.Bektaev búgingi baspasóz máslıhatynda.
Onyń aıtýynsha, búginnen bastap óz jumysyn bastaǵan respýblıkalyq jáne aımaqtyq shtabtar saılaýaldy úgit-nasıhat aıasynda 100-den astam sharany uıymdastyrady. Sonyń ishinde sanalýan kezdesýler men mádenı-sporttyq sharalar bar. Negizgi maqsat - kandıdattyń saılaýaldy baǵdalamasyn halyqqa jetkizý.
«Árıne, bundaı kezdesýlerdi árbir aýylda, árbir eldi mekende ótkizý múmkin emes shyǵar. Ol úshin saılaýshylardan aldyn ala keshirim suraımyz. Biraq respýblıkalyq buqaralyq aqparat quraldary arqyly, sonyń ishinde teledıdar arqyly, gazet pen radıo arqyly kandıdatymyzdyń saılaýaldy baǵdarlamasyn, negizgi jumysymyzdy jáne maqsat-mindetimizdi jetkizemiz», - dep atap kórsetti Á.Bektaev.
Aıta keteıik, búgin «Aýyl» partııasynyń atynan QR Prezıdenttigine kandıdat Tóleýtaı Raqymbekovtyń respýblıkalyq qoǵamdyq shtaby óz jumysyn bastady. Budan bólek, aımaqtyq shtabtar da jasaqtaldy.
