«Aýyl» partııasy óz depýtattaryn kóbeıtýdi kózdeıdi

ASTANA. QazAqparat - «Aýyl» xalyqtyq-demokratııalyq patrıottyq partııasy jergilikti jerde óz depýtattaryn kóbeıtip, eldiń saıası-áleýmettik máselelerine belsene aralasýǵa múddeli. Aldaǵy ýaqytta Parlamentte óz fraktsııasyn da qurýdan úmitti, dep xabarlaıdy QazAqparat tilshisi.

Partııa tóraǵasy Álı Bektaevtyń aıtýynsha, saılaýǵa qatysty konstıtýtsııalyq zańǵa ózgerister engizilgennen keıin jergilikti máslıxat depýtattaryn da partııalyq tizimmen saılaıtyn bolady Atalǵan norma partııalardyń rólin arttyryp otyr.

«Bizge de úlken múmkindik berildi. Sebebi «Aýyl» partııasynyń negizgi músheleri jergilikti jerlerde turady. Osy múmkindikti durys paıdalana bilýimiz kerek. Aýyl turǵyndarynyń múddesin laıyqty qorǵaımyz desek, bolashaqta barlyq aımaqtardaǵy aýyldyq jáne oblystyq máslıxattarda «Aýyl» partııasynyń depýtattary bolýy tıis. Ol úshin partııamyzdyń aımaqtardaǵy jumysyn jandandyrýymyz qajet», - dedi Á.Bektaev «Aýyl» HDPP-nyń kezekten tys XIV sezinde.

Onyń aıtýynsha, sońǵy esep boıynsha on aýdan men qalalarda «Aýyl» partııasynyń fılıaldary múldem joq. Atap aıtqanda, Atyraý, Qarajal, Baıqońyr, Tekeli qalalarynda, sondaı-aq, Astana men Almatynyń keıbir aýdandarynda partııanyń fılıaldary áli ashylmaǵan.

«Árıne, mundaı olqylyqtardy keıbir aýdandardyń jańadan ashylýy, «Aýyl» partııasyn qaıta qurylymdaý sııaqty sebeptermen de túsindirýge de bolady. Alaıda biz ártúrli ózgeristerge shapshań beıimdele biletin ilgerishil partııa bolýymyz qajet. Zań men zaman talaby osyndaı. Sondyqtan atalmysh aımaq fılıaldarynyń basshylaryna jiberilgen qatelikterdi jyl sońyna deıin joıýdy tapsyramyn. Bizdiń maqsatymyz - bolashaqta bolatyn saılaýlarda «Aýyl» partııasynyń parlamenttik partııaǵa aınalýy, Qazaqstan Respýblıkasynyń Parlamenti men máslıxattaryna óz depýtattarymyzdyń saılanýy. Sonda ǵana biz memlekettik basqarý júıesine aralasyp, aýyl turǵyndarynyń problemasyn sheshýge múmkindik alamyz. Aýyldyq eldi mekenderiniń ınfraqurylymyn jaqsartýǵa atsalysa alatyn bolamyz. Bizdiń nıetimiz adal, josparymyz anyq. Ol - aýylǵa qyzmet etý», - dep atap kórsetti Á.Bektaev.

Aıta keteıik, búgin Astanada «Aýyl» xalyqtyq-demokratııalyq patrıottyq partııasynyń kezekten tys XIV sezi ótti. Kún tártibinde prezıdıým quramyna ózgeris engizý jaıy talqylandy. Al partııa tóraǵasy Álı Bektaev «Bolashaq» baǵdarlamasy boıynsha aýyl jastaryn kóbirek oqytýmáselesin kóterdi.