«Aýyl» partııasy óńir dárigerlerine COVID-19 naýqastaryn emdeý týraly semınar ótkizdi
NUR-SÝLTAN. QazAqparat – «Aýyl» halyqtyq-demokratııalyq patrıottyq partııasy aýyldaǵy medıtsınalyq qyzmetkerlerge koronavırýstyq ınfektsııasy bar naýqastardy emdeý jóninde onlaın semınar ótkizdi, dep habarlaıdy QazAqparat tilshisi.
Onlaın semınarǵa 100-ge jýyq aýyl dárigerleri, feldsherler, túrli sanattaǵy medıtsına qyzmetkerleri Zoom platformasy arqyly qosyldy.
Jıyndy «Aýyl» partııasynyń belsendisi, joǵary sanatty nevrolog-epıleptolog Altynaı Elýbaeva men Joǵary sanatty nevrolog dárigeri Gúlnazııa Idenova júrgizdi. Olar pandemııa kezinde koronavırýs ınfektsııasy bar naýqastardy emdeýge qatysqan.
«Pandemııa kezinde bizdiń partııa aýyldardy aralap, medıtsınalyq qyzmetterdiń sapasyna monıtorıng júrgizdi. Árıne onda medıtsına qyzmetkerlerimen, aýyl turǵyndarymen kezdesip, osy indet týraly aqparattyń jetkiliksiz ekenin kórdik. Sapar barysynda biz aýyl turǵyndaryna qandaı aldyn alý sharalaryn júrgizý kerektigin túsindirdik, suraqtarǵa jaýap berdik. Keıbir aýyldarda medıtsınalyq pýnktter joq. Bul da - úlken másele, adamdar júginetin jer joq», - deıdi nevrolog-epıleptolog dáriger Altynaı Elýbaeva.
Onyń aıtýynsha, semınar JRVI men koronavırýstyq ınfektsııaǵa qatysty ózekti máselelerge arnalǵan, munda naýqastardy emdeý boıynsha keńes berildi.
«Máselen, naýqasta tynys alý jetkiliksizdigi baıqalsa, eń aldymen naýqas basqalarǵa vırýs juqtyrmas úshin shara qabyldaý qajet. Buqaralyq is-sharalar men otbasylyq merekelerdi azaıtý úshin medıtsına qyzmetkerleri halyqqa úndeý jasaýy tıis. Sebebi sımptomsyz tasymaldaýshylar saý adamdarǵa aýrý juqtyrýy múmkin», - deıdi dáriger.
Semınar spıkerleri aýyl dárigerlerine vırýs ınfektsııalarynan qorǵaý úshin qandaı aldyn alý sharalaryn júrgizýdi túsindirip, qatysýshylardyń suraqtaryna jaýap berdi.
