«Aýyl» partııasy Memleket basshysynyń Úndeýin qoldap, málimdeme jasady
«Qadirli Otandastar!
Qazaqstan Respýblıkasynyń Prezıdenti Qasym – Jomart Kemeluly Toqaev eldegi tótenshe jaǵdaıǵa baılanysty Qazaqstan halqyna 3 márte málimdeme jasady.
Memleket basshysynyń málimdemeleri koronavırýs indeti taralýynyń saldarynan kún ótken saıyn ózgerip jatqan eldegi áleýmettik jáne ekonomıkalyq máselelerdi naqty sheshýge baǵyttaldy. Ár málimdeme saıyn el azamattaryna arnalǵan jańa áleýmettik paketter jıyny jarııalanýda. Muny memleket basshysy men Úkimettiń búgingi el ekonomıkasynyń múmkindikterin saralap, qalyptasqan jaǵdaıdy shynaıy baǵalap, naqty nátıjege negizdelgen qadamdary dep qabyldaımyz.
Medıtsına salasy mamandaryn áleýmettik qoldaý jáne olarǵa qosymsha ótemaqy taǵaıyndaý týraly qabyldanǵan sheshimdi el turǵyndary tótenshe jaǵdaı sharttarynda óte ózekti jáne mańyzdy qadam dep qabyldap, buǵan jan –jaqty qoldaý bildirýde.
Prezıdenttiń málimdemesine oraı endigi kezekte ózin – ózi jumyspen qamtyǵan jáne resmı jumysy joq bolsa da, tabys kózi bar azamattar sanaty da bir aılyq tómengi jalaqy mólsherindegi áleýmettik tólemaqymen (42500 tg ) qamtylatyn boldy. ıAǵnı elimiz boıynsha jalpy sany 3 mln – ǵa jýyq azamat atalmysh tólemaqymen qamtylmaq. Budan bólek zeınetaqy men memlekettik járdemaqylardyń on paıyzǵa ósýi, mindetti áleýmettik medıtsınalyq saqtandyrý júıesine tirkelmegen azamattarǵa 1 shildege deıin atalmysh júıe aıasynda qyzmet kórsetý, múmkindigi shekteýli azamattar men balalar, kópbalaly otbasylarǵa turmysqa qajetti zattar men azyq – túlik túrlerin tegin berý, iri qalalardyń tóńiregindegi jastardy jumyspen qamtý úshin kóterme tólemaqy taǵaıyndaý sııaqty bastamalar qoǵamnyń áleýmettik turǵydan álsiz toptaryn qoldaý boıynsha óte qajetti jáne naqty sheshimder dep qabyldaımyz.
Ulttyq ekonomıkanyń negizgi qozǵaýshy kúshine aınalǵan orta jáne shaǵyn bıznesti qoldaýǵa baǵyttalǵan salyqtyq jeńildikter qazirgideı qıyn kezeńde asa qajetti qadam dep esepteımiz. Aýyl sharýashylyǵy salasynda kóktemgi egistik jumystaryna qosymsha qomaqty qarajat bólinip, janar – jaǵar maı baǵasyna jasalatyn jeńildikter de Tótenshe jaǵdaıǵa tap kelip, daǵdaryp qalǵan dıqandar qaýymyna senim men qajyr – qaırat syılary anyq. Bul maqsatqa memlekettik bıýdjetten qosymsha 70 mıllıard teńge qarjy bólinip, Agrarlyq kredıttik korporatsııasy arqyly 5 % paıyzdyq mólsherlememen nesıe berilmekshi.
Kóktemgi egistik jumystary shuǵyl sharalar men shapshań áreketti kerek etedi. Qabyldanǵan sheshimder negizinde jergilikti bılik ókilderi uıymdastyrý sharalaryn durys jolǵa alyp, aımaqtardaǵy sharýalardyń atalmysh jeńildikterdi bıýrokratııalyq bógettersiz ýaqtyly alýyna jaǵdaı jasap beredi dep úmittenemiz. Memleket basshysynyń Úkimetke otandyq aýyl sharýashylyǵy taýar óndirýshileriniń ónimderin 6 aıǵa kepildi satyp alý mehanızmin qalyptastyrýdy tapsyrýy aımaqtardaǵy sharýalardyń kúmánin seıiltip, olardy yntalandyryp, bilek sybana jumysqa kirisýlerine sebep bolatyn batyl sheshim dep bilemiz.
«Aýyl» Halyqtyq demokratııalyq patrıottyq partııasy Qazaqstan Respýblıkasynyń Prezıdenti Qasym – Jomart Kemeluly Toqaevtyń mańyzdy málimdemesine tolyqtaı qoldaý bildiredi. Barsha Otandastarymyzdy memleket basshysy tarapynan qolǵa alynyp jatqan bul bastamalardy qoldaýǵa shaqyramyz.
Búgingideı qıyn – qystaý kezeńde memleket pen qoǵamnyń mámileli áreketteri men sanaly qadam, salıqaly saıası sheshimderiniń elimizdi osynaý synnan din aman alyp shyǵaryna senimimiz berik! Biz birgemiz!»,-delingen habarlamada.
Aıta keteıik, keshe Prezıdent Qasym-Jomart Toqaev respýblıkalyq telearnalar efırinen málimdeme jasaǵan bolatyn.
