«Aýyl» partııasy Elbasy Joldaýyn túsindirýge arnalǵan 12 respýblıkalyq shara ótkizedi

ASTANA. QazAqparat - «Aýyl» partııasy Elbasy Joldaýyn túsindirýge arnalǵan 12 respýblıkalyq shara ótkizedi. Bul týraly «Aýyl» halyqtyq-demokratııalyq patrıottyq partııasy ortalyq apparatynyń jetekshisi Farıd Aqberdıev málim etti, dep habarlaıdy QazAqparat.

«Keshe teledıdardan Úkimet otyrysy kórsetildi. Onda Prezıdent tipti aýyldyń da máselesimen aınalysýyna týra kelip otyrǵandyǵyn aıtqan edi. Bul máselelermen aınalysatyn ákimderdiń, mınıstrlerdiń bolýyna qaramastan Prezıdentke barlyǵy úshin jaýap berýine týra keledi. Sebebi 1995 jyly qabyldanǵan Konstıtýtsııada barlyq jaýapkershilik Prezıdentke júktelgen. Sondyqtan Prezıdent oń sheshimder qabyldaıdy», - dedi ol.

Onyń atap ótýinshe, prezıdenttik basqarýdyń arqasynda Táýelsizdiktiń 25 jyly ishinde ósip-órkendegen memleket qura aldyq.

«Al endigi ýaqytta Prezıdent atqarýshylarǵa ózderine júktelgen is úshin jaýap beretin qyzmetterdi berý qajettigin aıtyp otyr. Bul máselede kóptegen suraqtar týyndaıtyn bolǵandyqtan «Aýyl» partııasy konstıtýtsııalyq reforma men Elbasy Joldaýyn talqylaýǵa arnalǵan is-sharalar josparyn túzdi. Máselen, endigi ýaqytta Prezıdenttiń joǵary arbıtr bolatyndyǵy aıtylýda. Árıne, bıliktiń birneshe tarmaǵy bolǵan kezde olardyń ókilettikterin retteıtin adam qajet», - dedi partııanyń apparat basshysy.

Sondaı-aq ol «Aýyl» partııasy Elbasy Joldaýyn túsindirýge arnalǵan 15 shara ótkizgendigin, jyl sońyna deıin dóńgelek ústelder, aktıv jınalystaryn ótkizýdi kózdep otyrǵandyǵyn aıtty.

«Jyldyń sońyna deıin partııa respýblıkalyq deńgeıdegi 12 sharany ótkizetin bolady», - dedi Aqberdıev.