«Aýyl» partııasy Elbasy Joldaýy aıasyndaǵy josparlarymen bólisti

ASTANA. QazAqparat - Búgin Astanada Elbasynyń 5 qazandaǵy jańa Joldaýyna talqylaý maqsatynda «Aýyl» halyqtyq-demokratııalyq patrıottyq partııasynyń saıası keńesi prezıdýmynyń keńeıtilgen otyrysy ótti, dep habarlaıdy QazAqparat tilshisi.

Otyrysta halyqtyń ál-aýqatyn kóterýge negizdelgen Joldaýdyń basym baǵyttary men ony iske asyrýmen baılanysty maqsat-mindetter sóz boldy.

«Bıylǵy Joldaýdyń máni tereń. Óıtkeni Prezıdentimiz halyq tabysynyń ósýi, kásipkerlikti damytý, turmys sapasyn arttyrý sekildi halyqtyń ómirimen tikeleı baılanysty máselelerdi qozǵap, olar boıynsha quzyrly organ ókilderine birqatar mindetterdi júktedi. El turǵyndarynyń ómir sapasy turmysyn jaqsartýda, ekonomıkasy damyǵan, áleýeti joǵary memleket qalyptastyrýda atalǵan mindetterdiń mańyzy zor. Joldaý júktegen mindetterdiń ásirese aýyl halqyna yqpaly oń bolady degen oıdamyz», - dedi «Aýyl» partııasynyń tóraǵasy, QR Parlamenti Senatynyń depýtaty Álı Bektaev.

Onyń sózinshe, Joldaýdan týyndaıtyn mindetterge qatysty ótken aptada Túrkistan oblysynda 200-den astam muǵalimmen kezdesý ótip, olardyń máseleleri qaralyp, usynystary tyńdaldy jáne osy sekildi kezdesý aldaǵy ýaqytta elimizdiń barlyq óńirlerinde ótedi.

Sondaı-aq, jıynda partııanyń aımaqtardaǵy fılıaldarynyń strategııalyq baǵdarlamasyn talqylap, nasıhattaýǵa arnalǵan qoǵamdyq-saıası is-sharalar jospary pysyqtalyp, bekitildi.

Aıta ketsek, Elbasy ústimizdegi jaldyń 5 qazanyndaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda aýyldyq jerlerdiń áleýmettik ortasyn jańǵyrtý qajettigin atap ótip, osy maqsatta «Aýyl - El besigi» jobasynyń iske qosylýyn jáne atalǵan joba arqyly óńirlerdegi eńbekke qatysty ıdeologııany ilgeriletýdi qolǵa alýdy tapsyrǵan bolatyn.