«Aýyl» partııasy bolashaq kásipkerler úshin semınar trenıng ótkizdi

NUR-SULTAN. QazAqparat - «Aýyl» Halyqtyq-demokratııalyq patrıottyq partııasynyń Qyzylorda oblysy boıynsha fılıaly kásibin jańa bastaǵan fermerler úshin aýyl sharýashylyǵy taýar óndirýshileriniń qatysýymen «Násiptiń kilti - kásipte» taqyrybynda semınar-trenıng uıymdastyrdy, dep habarlaıdy QazAqparat atalmysh saıası uıymnyń baspasóz qyzmetine silteme jasap.

Semınar Qyzylorda oblysy Syrdarııa aýdany Shirkeıli aýylynda ornalasqan «Ysamaddın» sharýa qojalyǵynda ótti. Bul qatysýshylarǵa sharýa qojalyǵynyń sońǵy jyldardaǵy jetistikterin óz kózimen kórýge múmkindik berdi. «Aýyl» HDPP múshesi, «Ysamaddın» sharýa qojalyǵynyń basshysy Janarbek Nurymbetov sharýashylyǵyn aralatyp, kásibiniń qyr-syrymen tanystyrdy. Onyń aıtýynsha, «Ysamaddın» sharýashylyǵy 10 jyldan asa iri qara men jylqy ósirýmen aınalysyp keledi. 2012 jyly munda bir aýysymda 2,5-5 tonnaǵa deıin et óńdeıtin keshen jumysy iske qosyldy. Búgingi tańda sharýa qojalyǵy Qyzylorda oblysynyń turǵyndaryn azyq-túlikpen (sút, maı, et), shıkizatpen (jún, teri) qamtamasyz etýde.

Sonymen qatar, semınarda «Atameken» kásipkerler palatasy oblystyq fılıalynyń Bastaý bıznes jobasy boıynsha aǵa keńesshisi Madına Qasymjan jastarǵa bıznes bastaýdyń praktıkalyq-tájirıbesimen bólisti. Sonymen qatar, aýyl sharýashylyǵy taýar óndirýshilerin qoldaý jónindegi memlekettik baǵdarlamalar, sýbsıdııalar, nesıeler jáne t. b. týraly egjeı-tegjeıli aıtyp berdi.

Qatysýshylar semınardyń sharýa qojalyǵynda ótkeni olar úshin óte qyzyqty, tanymdy jáne jaqsy tájirıbe bolǵanyn atap ótti. Óıtkeni olar búkil sharýashylyqtyń jumysyn, maldy ustaý jaǵdaılaryn kórý múmkindigine ıe boldy.

«Aýyl» partııasy Qyzylorda oblysy boıynsha fılıalynyń tóraǵasy Serikbaı Ómirzaqovtyń aıtýynsha, saıası uıymnyń kóptegen fılıaldary mundaı jınalystardy óndiriste ótkizedi. Óıtkeni dál osyndaı format óziniń tıimdiligin dáleldedi. Sharýashylyqtyń shynaıy jaǵdaıymen tanysqan bolashaq kásipkerler úshin bul tuńǵysh tájirıbeden ótkenmen birdeı. Osyndaı semınarlardan keıin olardyń salaǵa degen qyzyǵýshylyǵy artatyndyǵy sózsiz.

Aıta keteıik, atalmysh semınar «Aýyl» HDPP XVI sezinde qabyldanǵan partııanyń «Aýyl-dostar» saıası bastamasy aıasynda ótti. Bastama maqsaty - týǵan aýylynyń bolashaǵyna beı-jaı qaramaıtyn partııanyń barlyq jaqtastaryn, óz Otanyn súıetin el patrıottaryn biriktirý.