«Aýyl» partııasy áleýmettik karta jasaýdy usyndy

AQTAÝ. QazAqparat – Aqtaýda «Aýyl» halyqtyq-demokratııalyq patrıottyq partııasynyń uıymdastyrýmen «Memlekettik qoldaý: kóp balaly áıelder jáne balalarǵa arnalǵan bir jolǵy kómekter» taqyrybynda áleýmettik saıasatty qalyptastyrý, járdemaqynyń ár balaǵa tólenýin qamtamasyz etý boıynsha dóńgelek ústel ótti, dep habarlaıdy QazAqparat.

Sharaǵa partııanyń Mańǵystaý oblystyq fılıalynyń tóraǵasy Qýat Mashyryqov, úkimettik emes uıym ókilderi, kóp balaly analar qatysty.

«Aýyl» partııasy áleýmettik saladaǵy mańyzdy máselelerdi jıi kóterip júr. Kópshilik qadamdardyń iske asýyna, ómirge eńýine sebepshi bolyp kelemiz. Sondyqtan taǵy bir mańyzdy taqyrypty talqylaý úshin jınalyp otyrmyz. Partııanyń bastamasymen jaqynda ǵana Túrkistan qalasynda ulttyq qundylyqtarymyzdy damytý jóninde jańa tujyrymdama usynyldy. Biz ulttyq qundylyqtar týraly kóp aıtamyz, biraq osy qundylyqtardyń kóptegen mańyzdy máseleleri shette qalyp ketedi. Sonyń biri – ol otbasylyq qundylyqtar. Bizdiń osy ulttyq qundylyqtarymyz ár adamnyń ómir jolyna, ósip-óńýine áser etedi», - dedi «Aýyl» partııasynyń tóraǵasy K.Mashyryqov.

Dóńgelek ústel barysynda saıası uıym músheleri bala týǵanda jáne bala kútimi kezinde analarǵa memleket tarapynan beriletin áleýmettik tólemderdiń tómen deńgeıine baılanysty óz alańdaýshylyqtaryn bildirdi. Áleýmettik kómek túrleriniń jáne olardy alý sharttary azamattardy shatastyrady.

Sondaı-aq, aýyl turǵyndary memleket qoldaýyna ıe bolý úshin óz tabystarynyń tómen deńgeıin dáleldemeýi tıis dep esepteıdi.

Dóńgelek ústelge qatysýshylar memlekettik organdarǵa balany týǵannan bastap 18 jasqa tolǵanǵa deıin áleýmettik qoldaýdyń biryńǵaı standartyn anyqtaýdy usyndy.

«Mysaly, qazir otbasynda úsh bala bolsa tuńǵyshy 18 jasqa tolǵan soń járdemaqy birden toqtatylady. ıAǵnı, ár bala 18 jasqa tolǵansha járdemaqy tólense, degen usynys aıtamyn. Mektepke deıingi bilim berý mekemeleriniń jáne mektep jasyndaǵy balalar úshin aqyly qosymsha bilim alýdyń qoljetimsizdigi qazirgi kezde úlken áleýmettik máselege aınalǵan. Bir sózben aıtqanda ana men balany qoldaý saıasatynda túıini sheshilmegen túıtkildi máseleler barshylyq. Búgin biz sizdermen osy máselelerdi talqylaý úshin bas qostyq.Balalar - bizdiń bolashaǵymyz. Eger biz qazir áleýmettik kómekti kedeılik sheginiń 70% sheginde tóleı otyryp, tárbıeleıtin bolsaq, onda bolashaqta olardan otansúıgishtikti, Otan úshin tolyq berilgendikti talap etýge moraldyq quqyǵymyz joq», - dedi kópbalaly ana Gúljanat Muratbaı.

Jıyn sońynda biryńǵaı áleýmettik qor qurý, áleýmettik karta jasaý usynystar aıtyldy.