«Aýyl» partııasy: 10 jyl boıy fýtbolǵa bólingen aqshaǵa 500 aýyldyń jaǵdaıyn jaqsartýǵa bolar edi

NUR-SULTAN. QazAqparat – «Aýyl» HDPP múshesi Anas Baqqojaev jaqtastarymen tıimsiz baǵdarlamalarǵa mıllıardtap qarajat bólgizýdi toqtatqaly otyr, dep habarlaıdy QazAqparat tilshisi.

«El amanaty» saýalnamasyn ótkizgen ýaqytta halyq aýyldaǵy aýyz sý máselesin, joldyń sapasyna qatysty shaǵymdaryn aıtyp jatyr. Bul máselelerdi sheshýdiń birneshe joly bar. Birinshiden, «Aýyl» partııasy aýyldy aımaqtardy damytýdyń modelin usynady. Sonymen birge aýyl-aımaqtardy damytý boıynsha strategııalyq qujat daıyndaımyz. Esterińizde bolsa, 2004-2010 jyldary «Aýyl-aımaqtardy damytý baǵdarlamasy» iske asyrylǵan bolatyn. Sonyń sheńberinde aýyldardyń bárin de qujattap, ne bar, ne joǵy anyqtalǵan. Sońynan osy baǵytta tipti komıtet qurylǵan edi. 2010 jyldan beri baǵdarlama umytylyp ketti. Komıtet qazir joq. Osynyń bárine qalpyna keltirý kerek dep oılaımyz», - dedi Anas Baqqojaev OKQ-da ótken baspasóz máslıhatynda.

Partııa múshesi aýyldarǵa bıýdjetten qarajat bólinýi kerektigin málim etti.

«Aqsha tabý qıyn zaman desek te, bıýdjette mundaı múmkindik bar. Qazir tıimsiz, qoǵamǵa keregi joq baǵdarlama óte kóp. Bir fýtboldyń ózine keıingi 10 jyldyń ishinde 300 mlrd teńgege deıin demeýshilerden kómek kórsetilgen, Úkimet tarapynan aqsha bólinip jatyr. Sol qarajatqa kem degende 500 aýyldyń jaǵdaıyn jaqsartýǵa bolar edi. Sondyqtan partııa tıimsiz baǵdarlamalardy anyqtap, únemdelgen aqshany tek aýyldyń ınfraqurylymyn túzeýdi usynyp otyr», - dedi ol.

Aıta ketsek búgingi baspasóz máslıhatynda «Aýyl» HDPP tóraǵasynyń birinshi orynbasary Tóleýtaı Raqymbekov «El amanaty» jalpyulttyq saýalnamasynyń nátıjesin jarııalaǵan bolatyn.