Aýyl muǵalimi «Bolashaq» baǵdarlamasymen AQSh-tyń úzdik joǵary oqý ornyna tústi

NUR-SULTAN. QazAqparat - Almaty oblysynyń Jambyl aýdanyndaǵy Uzynaǵash aýyly orta mektebiniń matematıka páni muǵalimi Gúlzııa Qumanqanǵa «Bolashaq» halyqaralyq stıpendııasy taǵaıyndaldy.

«Halyqaralyq baǵdarlamalar ortalyǵy» AQ baspasóz qyzmetiniń málimetterine qaraǵanda, Gúlzııa AQSh-tyń jetekshi joǵary oqý orny – Ońtústik Florıda ýnıversıtetinde «Matematıkalyq bilim berý» mamandyǵy boıynsha magıstratýrada oqıdy.

Pedagog ınternet jelisindegi onlaın sabaqtar men dáristerdiń kómegimen aǵylshyn tilin bastapqy deńgeıden joǵary deńgeıge deıin meńgerdi. Gúlzııa shet tilin kúnine 5-6 saǵat boıy oqydy. Osynyń arqasynda ol IELTS emtıhany boıynsha 9 joǵary baldan 7 ball jınap, AQSh-tyń eń bedeldi joǵary oqý ornyna tústi.

«Men aýyldan shyqpaı-aq, «Bolashaq» stıpendııasyn taǵaıyndaýǵa konkýrstyq irikteýden sátti óttim. Qarapaıym aýyl mektebinde oqydym, qazir sol aýyl mektebinde jumys isteımin. Álemdegi eń úzdik ýnıversıtette oqýǵa múmkindigim bolatynyn tipti elestete de almadym. Bilim men ózińe degen senim árqashan qalaǵan nárseńe jetýge kómektesetinine senimdimin. Shákirtterim de álemdegi eń úzdik bilim alǵanyn qalaımyn. Olar menen úlgi alyp, shabyttanady dep úmittenemin», - dep áńgimeledi Gúlzııa Qurmanqan.

Esterińizge sala keteıik, Kadrlardy shetelde daıarlaý jónindegi respýblıkalyq komıssııa sheshimimen 2022 jylǵy alǵashqy aǵynynda stıpendııa 199 qazaqstandyqqa taǵaıyndaldy. Olardyń ishinde 29 stıpendııa pedagogter men oqytýshylarǵa taǵaıyndaldy.

Jalpy alǵanda, bıyl magıstratýra men rezıdentýra baǵdarlamalaryna 385 stıpendııa, doktorantýra baǵdarlamasyna 60 stıpendııa bólindi.

Osy jyldyń sońyna deıin Respýblıkalyq komıssııanyń taǵy eki otyrysy ótedi. «Bolashaq» halyqaralyq stıpendııasyn taǵaıyndaýǵa konkýrstyq irikteýge qatysý úshin qujattar bıylǵy jylǵy 14 qazanǵa deıin qabyldanady. Taǵylymdamadan ótý úshin qujattar qabyldaý 2022 jylǵy 5 qyrkúıekte bastalyp, 14 qazanǵa deıin ótedi.

Foto: bolashak.gov.kz