Aýyl muǵalimderine kommýnaldyq qyzmet úshin beriletin ótemaqy retteledi
ASTANA. QazAqparat - Qazaqstan Respýblıkasy Bilim jáne ǵylym qyzmetkerleri kásipodaǵy tóraǵasynyń orynbasary Aıgúl Muqasheva «Pedagogtar mártebesi týraly» zań jobasyna engizilgen usynystar týraly aıtyp berdi, dep habarlaıdy QazAqparat tilshisi.
«Biz, bilim qyzmetkerleri kásipodaǵynyń ókilderi retinde kásipodaq múshelerinen 300-den astam usynys qabyldadyq. Jumys tobyna usynǵanymyzda barlyq bastamalar qoldaý tapty. Jumys toby QR Prezıdenti Bilim jáne ǵylym mınıstrligine tapsyrma bergennen keıin birden jumysyn bastady. Qazirgi tańda jumys tobynda 48 adam jumys isteıdi. Bul zań jobasy ǵana, ıaǵnı zańnyń sońǵy nusqasyn bildirmeıdi. Qazir ol tolyqtyrylyp, pysyqtalyp jatyr», - dedi ol QR Bilim jáne ǵylym mınıstrliginde ótken basqosýda.
Onyń aıtýynsha, tıimdi zańdy qabyldaý úshin árbir qazaqstandyqtyń atalmysh zań jobasyna ún qosqany mańyzdy.
«Muǵalimniń ıgiligi úshin bárimiz de atsalysyp, zańdy birge talqylaýymyz kerek. Bul zań Májiliste talqylanǵannan keıin ǵana qabyldanady. Men sondaı-aq bizdiń qurmetti ustazdar qaýymy men ata-analarǵa jumysqa belsendi qatysyńyzdar, óz usynystaryńyzdy jiberińizder dep aıtqym keledi», - deıdi ol.
Zań jobasynyń sheńberinde naqty usynystar týraly aıtqan Aıgúl Muqasheva bilim berý protsesinde materıaldyq jaǵynan qamtamasyz etý, muǵalimderdiń áleýmettik kepildikteri turǵysynan kóptegen usynystar kelip jatqanyn atap ótti.
«Munyń bárin biz jumys tobynyń qaraýyna shyǵardyq. Qazir barlyq usynystar zań jobasynda bar. Áleýmettik kepildikter týraly aıtar bolsaq, «Bilim týraly» Qazaqstan Respýblıkasynyń qazirgi zańyndaǵy muǵalimniń mártebesi týraly 7 taraý tolyq deńgeıde jumys istemeı tur. Sebebi, áleýmettik kepildikter jergilikti atqarýshy organdardyń qaraýyna berilgen», - deıdi Aıgúl Muqasheva.
Kásipodaq ókiliniń aıtýyna qaraǵanda, aýyldy jerlerde jumys isteıtin muǵalimder úshin - kommýnaldyq qyzmetterdi óteý, qalalardaǵy muǵalimdermen salystyrǵanda 25 paıyzǵa joǵary jalaqy berý jeńildikteri bar.
«Búkil Qazaqstan boıynsha aýyl muǵalimderine qaladaǵydan góri 25 paıyz artyq aqsha berý oryndalǵanymen, kommýnaldyq jáne medıtsınalyq qyzmetterge qatysty jeńildikter tolyq oryndaldy dep aıta almaımyz. Máselen, Almaty men Qyzylorda oblystarynda muǵalimder óz qarajaty esebinen medıtsınalyq tekserýden ótedi, sebebi jergilikti bıýdjette bul úshin qarajat qarastyrylmaǵan», - deıdi ol.
Aıgúl Muqasheva ótemaqy turǵysynan Soltústik Qazaqstandaǵy muǵalimderdiń máselelerin de atady.
«Soltústik Qazaqstanda turatyn muǵalimderdi alatyn bolsaq, olardyń ótemaqysynyń mólsheri bar-joǵy 1300 teńge ǵana. Munda muǵalimge 1,3 myń teńge beriledi de, al kómirdiń tonnasy 18 myńnan 24 myń teńgege deıin bolady. Bul máseleni birneshe ret kótergen edik. Meniń oıymsha, kommýnaldyq qyzmetter úshin ótemaqy muǵalimder turatyn oblystyń aımaqtyq erekshelikterine qaraı berilýi kerek», - dep qorytyndylady ol.
Eske sala ketsek, Memleket basshysy Nursultan Nazarbaev Qazaqstan halqyna Joldaýynda 2019 jyly Qazaqstanda «Pedagogtardyń mártebesi» týraly Zań qabyldaý kerektigin aıtqan edi.
Aıta keterligi, BǴM-daǵy búgingi basqosýda zań jobasy boıynsha eńbek etip jatqan jumys toby muǵalimdi mindetinen tys jumysqa tartqandardy ákimshilik jaýapkershilikke tartýdy usyndy.
