Aýyl men qala mektepterine birdeı jaǵdaı jasalýy kerek – Qasym-Jomart Toqaev
«Bilim berý isindegi teńsizdikti joıý mańyzdy. Bul másele kóptegen damyǵan elderde ózekti. Ol halyqtyń álemýettik-ekonomıkalyq ál-aýqatyna tikeleı baılanysty. Bizdegi aýyl men qala balalarynyń arasynda bilim berý deńgeıi boıynsha aıyrmashylyq bolmaýy kerek. Bilim berý standarttary biryńǵaı bolýy tıis. Bul bilim berý baǵdarlamasyna da qatysty. Barlyq balalar turǵylyqty ornyna, ata-anasynyń áleýmettik mártebesine qaramaı, sapaly bilimge qol jetkize alýy kerek. Bilim jáne ǵylym mınıstrligine tabysy tómen otbasylar men kúrdeli áleýmettik jaǵdaıda jumys istep jatqan mektepterdiń balalarynyń akademııalyq artta qalýyn joıatyn arnaıy baǵdarlamalardy daıyndap iske qosýdy tapsyramyn. Oblys ákimderi bul tapsyrmamen túbegeıli aınalysýy kerek. Jer-jerde balalarymyzǵa barlyq jaǵdaı jasaý – olardyń tikeleı jaýapkershiligi», - dedi Prezıdent.
Ol sondaı-aq, oblys ákimderine jergilikti grant boıynsha bilim alatyn túlekterdi óz ólkesinde qaldyrýdyń júıesin qalyptastyrýda tapsyrdy.
«Aýyldy jerlerdegi kóptegen shaǵyn komplektili mektepterde bir muǵalim birneshe pánnen sabaq berýge májbúr bolyp júrgende qandaı bilim sapasy týraly aıtýǵa bolady? Óńir ákimderine oblys mektepterine úzdik muǵalimder men pedagogtardy tartý úshin granttar bólýdi tapsyramyn. Bilim berý – ekonomıkanyń naqty salasy. Sondyqtan, ol mańyzdy nazar men kólemdi salymdy talap etedi. Tek solaı ǵana óńirler men elimizdiń damýyn qamtamasyz ete alamyz. Ákimder túlekterdi óz ólkesinde qaldyrýdyń júıesin oılastyra otyryp, júıeli túrde joǵary oqý oryndarynda bilim alýǵa múmkindik beretin jeke granttar bólýi qajet», - dedi Qasym-Jomart Toqaev.
Eske salsaq, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Tamyz konferentsııasy ótip jatyr. Memleket basshysy jıynda aǵylshyn tilin oqytý qaı synyptardan bastalatynyn aıtty. Sondaı-aq barlyq pedagogtardyń eńbek demalysy 56 kúnge deıin kóbeıtilýi múmkin ekendigi málim etildi.
