Aýyl mektepteriniń muǵalimderin «Bolashaq» arqyly oqytý pysyqtalady

ASTANA. QazAqparat - Sheteldiń bedeldi joǵary oqý oryndaryna «óz betinshe túskenderge» aldaǵy ýaqytta 2 jyldyq eńbek ótili týraly talap qoıylmaýy múmkin. Bul týraly búgin QR Memlekettik hatshysy Gúlshara Ábdiqalyqovanyń qatysýymen ótken Shetelde kadrlar daıarlaý jónindegi respýblıkalyq komıssııanyń kezekti otyrysynan keıin «Halyqaralyq baǵdarlamalar ortalyǵy» AQ prezıdenti Ǵanı Nyǵymetov málim etti.

«Damý jospary aıasynda birqatar jańa tapsyrmalar berildi. Birinshi tapsyrma aıasynda sheteldiń bedeldi joǵary oqý oryndaryna magıstratýra men doktorantýraǵa «óz betinshe túskender» sanaty boıynsha úmitkerlerge aldaǵy ýaqytta 2 jyldyq eńbek ótili bolýy jónindegi talap qoıylmaıdy. Osy rette Qazaqstannyń JOO-syn támamdaǵan túlekter shetelge óz kúshimen tússe, bizge kelgende qarjylandyrý máselesi sheshiledi. Olardan eki jyl eńbek ótili talap etilmeıdi»,-dedi Ǵanı Nyǵymetov.

Budan keıin ol aýyl mektepteriniń muǵalimderin «Bolashaq» arqyly daıarlap, oqytý baǵytyna toqtala kele: «osy baǵytta bizge tıisti tapsyrma júkteldi. Bul turǵydaǵy sharalardy pysyqtap, kelesi otyrysta osy máseleni talqyǵa shyǵaramyz»,-dedi.

Sonymen qatar ol memlekettik organdardyń basshylaryn, jetekshilerin eń bedeldi bıznes-mektepterde daıarlyqtan ótkizý jumysy qolǵa alynatynyn atap ótti.«Bul másele de kelesi otyrystyń qaraýyna shyǵarylsyn degen tapsyrma berildi»,-dedi Ǵ. Nyǵymetov. 

Atap aıtqanda, aǵymdaǵy jyldyń basynan beri baǵdarlama QR Prezıdentiniń «Bolashaq» halyqaralyq stıpendııasynyń 2016-2020 jyldarǵa arnalǵan jańa damý jospary boıynsha iske asyrylýda, qujatta ony jańartýdyń negizgi baǵyttary belgilengen.