Aýyl mektepterin jabýǵa bolmaıdy – Qasym-Jomart Toqaev
NUR-SULTAN. QazAqparat – Elordada ótip jatqan Tamyz konferentsııasynda Memleket basshysy Qasym-Jomart Toqaev shalǵaıdaǵy mektepterdi oılanbaı jaba berýge bolmaıtynyn aıtty, dep habarlaıdy QazAqparat tilshisi.
«Búginde jalpy bilim beretin 7 014 mekteptiń 128-i úsh aýysymmen jumys isteıdi. 31 mektep apattyq jaǵdaıda. 2019-2020 jyldar aralyǵynda úsh aýysymdy oqytýdy joıyp, apattyq mektepterdi almastyrý úshin respýblıkalyq bıýdjet esebinen 35 mektep salynady. Táýelsizdik jyldarynda 1 198 mektep salynǵan. Biz demografııalyq tendentsııalardy eskere otyryp, mektepter salý jáne jańǵyrtý isin ári qaraı da jalǵastyramyz», - dedi Prezıdent óz sózinde.
Ol sondaı-aq, shalǵaıdaǵy aýyldardyń kóbi mektepterdiń arqasynda taramaı otyrǵanyn aıtty.
«Bilim jáne ǵylym mınıstrligine mektep qurylysyna ketetin qarjyny josparlaý júıesin qaıta qaraý kerek. Naqty aıtsaq, nysandyq josparlaýdan normatıvtik josparlaý júıesine kóshý qajet. Óńir ákimderi jańa mektep salý nemese jóndeýdi josparlaý kezinde demografııalyq jáne mıgratsııalyq jaǵdaıdy eskergeni abzal. Memlekettik-jekeshelik áriptestik tetigi arqyly jeke menshik mektepter salý jaǵyn qarastyrý qajet. Shaǵyn komplektili mektepterdi tıimdi damytý mańyzdy másele. Kóptegen shalǵaıdaǵy eldi mekender sondaı mektepterdiń arqasynda qurymaı tur. Sondyqtan mektepterdi oılanbastan jabýǵa bolmaıdy. Mundaıda keleshegi aıqyn eldi mekenderge basymdyq bere otyryp, jan-jaqty sheshim shyǵarǵan jón. Árbir shaǵyn komplektilik mekteptiń ahýaly aýyl taǵdyrymen tikeleı baılanysty. Al aýyl – bizdiń altyn besigimiz, ata-babamyzdyń mekeni, tereń tarıhymyzdyń kýási. Sondyqtan ony saqtap qalýymyz kerek», - dedi Prezıdent.
Eske salsaq, Elordadaǵy Táýelsizdik saraıynda Tamyz konferentsııasy ótti. Jıynda Qasym-Jomart Toqaev aǵylshyn tilin oqytý qaı synyptardan bastalatynyn aıtty. Konferentsııa barysynda Memleket basshysy barlyq pedagogtardyń eńbek demalysy 56 kúnge deıin bolatynyn aıtty.
