Aýyl mektepterin damytýǵa qyrýar qarjy bólindi
Jobanyń jalpy quny - 75 mln AQSh dollary. Sonyń basym bóligi - 67 mln-dy Dúnıejúzilik bank berip otyr, qalǵany - bıýdjet qarajaty. Osy qarjyǵa aýyl mektepterin mýltımedıalyq qural-jabdyqtarmen qamtamasyz etip, muǵalimderdiń kásibı biliktiligin kóterý josparlanǵan. Negizgi maqsat - qala men aýyl mektepteriniń bilimin teńestirý. QR Bilim jáne ǵylym vıtse-mınıstri Elmıra Sýxanberdıevanyń aıtýynsha, 75 mln dollardyń 60 paıyzy mýltımedıalyq qural-jabdyqty satyp alýǵa jumsalady. Ondaı qurylǵylar 5 myń mektepke jetkiziledi degen jospar bar. Onyń barlyǵy - aýyl mektepteri.
«Osynyń arqasynda aýyl mektepteri bilim salasyndaǵy jańa texnologııalardy qoldana alady. Testileýdi onlaın rejımde ótkizýge múmkindik bolady. Joba aıasynda pedogıkalyq bilimdi jańǵyrtýǵa arnalǵan sharalar da bar. Osyǵan oraı, pedagogıkalyq mamandyqtar boıynsha 30 jańa oqý baǵdarlamasy ázirlenedi. Sondaı-aq, muǵalimderdi daıarlaýdyń jańa modeli jasalady», - dedi E.Sýxanberdıeva Astanada ótken baspasóz máslıxatynda.
Aıta ketken jón, joba aıasynda 16 pedagogıkalyq joǵary oqý ornyn materıaldyq jaǵynan kúsheıtý josparlanyp otyr. Budan bólek, ınklıýzıvti bilim berýge erekshe kóńil bólinedi.
«Dúnıejúzilik bank óz aqshasyn 17 jylǵa 2 paıyzben berip otyr. Sebebi bul - áleýmettik joba. Sosyn bes jylǵa arnaıy jeńildik qarastyrylǵan. Bul degenimiz - aldaǵy bes jylda biz eshqandaı paıyz tólemeımiz. Aldymen mýltımedıalyq qural-jabdyqtardy alamyz. Odan keıin baǵdarlamalardy ázirleımiz. Sodan soń muǵalimderdiń biliktiligin kóteremiz» , - dep atap kórsetti E.Sýhanberdıeva.