Aýyl mektepteri úshin respýblıkalyq olımpıadanyń jobasy daıyndalýda - mınıstr

QYZYLORDA. QazAqparat - Oqý-aǵartý mınıstri Ǵanı Beısembaev Baıqońyr qalasynyń bilim berý uıymdaryna baryp, balalardyń qaýipsizdigin qamtamasyz etý jumysymen tanysty. Munda pedagogıkalyq qoǵamdastyqpen de kezdesý ótti, dep habarlaıdy QazAqparat.

«Aýyl mektepteri úshin jalpy bilim beretin pánder boıynsha Respýblıkalyq olımpıadanyń jobasy daıyndalýda. Bolashaqta aýyldyq mektepter qazaqstandyq bilim berýdiń draıveri bolýy tıis», - dep atap ótti onda Ǵanı Beısembaev.

Baıqońyr qalasynda barlyǵy bes mektep bar, onda 574 pedagog jumys isteıdi jáne 5410 oqýshy bilim alady.

Qazaly aýdanynyń 600-ge jýyq oqýshysy men kolledj stýdentteri ashyq dıalog alańynda bilim berýdi damytý boıynsha óz ıdeıalarymen bólisti. Mınıstrge túlekterdiń emtıhan tapsyrýy, aýyl mektepterin damytý jáne bolashaq pedagogterdi qoldaý týraly suraqtar qoıdy.

Eske salsaq, «Altyn belgi» úmitkerleri bıyldan bastap emtıhandy óz mektepterinde tapsyratyn bolady. Sonymen qatar, bıyl kolledj stýdentteriniń stıpendııasy 50%-ǵa, kelesi jyly 100%-ǵa kóteriledi. Taǵy bir jetistik – dýaldy oqytý aıasynda endi kolledj stýdentteriniń praktıkadan ótý kezi eńbek ótiline esepteledi.

Qazaly aýdanynyń eki kolledjinde 900 stýdent oqıdy. 800 mektep túleginiń 56-sy «Altyn belgi» úmitkeri.