Aýyl mektepteri arasynda respýblıkalyq olımpıada bolady – Oqý mınıstri
Aqtóbede «Shaǵyn jınaqty mektepterde sapaly bilimge qoljetimdilikti qamtamasyz etý» taqyrybynda respýblıkalyq semınar-keńes ótti. Oqý-aǵartý mınıstri Ǵanı Beısembaev bilim berý salasyndaǵy tyń bastamalarǵa toqtaldy.
«Áriptesim qyzyq oqıǵa aıtty. «Men óz aýylyma úlken olımpıada ótkizýge bardym. Aýdannyń bilim bólimi «siz demala berińiz, biz ótkizemiz» degenine qaramaı, basy-qasynda ózim bolamyn dep sheshtim» dedi. Sóıtip myqty matematıkterdi jınap, olımpıada ótkizgen. Sol olımpıadada myqty dep júrgen mekteptiń oqýshysy úshinshi oryn, al shalǵaı aýyldaǵy jaı ǵana mektep oqýshysy birinshi oryn alǵan. «Muǵalimin suradym. Úlken kisi eken. Qolymdaǵy saǵatymdy sheship berdim. Eki aı buryn ǵana aýdandyq olımpıada ótip, oqýshy qyz ádiletsizdikke ushyrap, oryn ala almaı qalǵan eken. Keleside olımpıadaǵa barmaımyn degen balaǵa muǵalimi ózi taksı jaldap, aýdan ortalyǵyna ákelgen» dep aıtty. Úlken dúnıeni eskermeı, keıde durys emes dúnıelerge bas uryp, daryndy men talanttydan aıyrylyp jatqan joqpyz ba degen oı meni mazalaıdy. Endi aýyl mektepteriniń arasynda jeke respýblıkalyq olımpıada bolady», - dedi Oqý-aǵartý mınıstri Ǵanı Beısembaev. Ol lıtseı, gımnazııa, daryndy balalarǵa arnalǵan mektepterdi ashýǵa áýestenbeýge shaqyrdy. Darynnyń barlyǵy darhan dalada ornalasqan mektepterde júrýi múmkin ekenin eske saldy.
«Tsıfrlyq aýyl» mektebi Aqtóbe oblysynda júrgizilýi kerek. Jańalyqtardyń bárin Aqtóbe oblysynda bastaımyz, pysyqtaımyz, sosyn elge taratýdy qolǵa alamyz. Aýyl mektepteriniń haby Aqtóbe oblysynda bastalady dep senemin. Sonymen birge aýyl mektepteri muǵalimderiniń de biliktiligin arttyrýǵa qatysty «Órleý» biliktilikti arttyrý ulttyq ortalyǵyna tapsyrma beremin. Kýrstyq baǵdarlama jańartylýy kerek. Aýyl mektepteriniń muǵalimderi «Bolashaq» baǵdarlamasy sheńgerinde 1, 3, 6 aılyq sheteldik taǵylymdamaǵa jiberiledi», - dedi mınıstr.
Aqtóbe oblysyndaǵy mektep dırektorlary, bilim salasyna jaýapty mamandarmen kezdesýinde mınıstr UBT tapsyrýdaǵy qıyndyqtarǵa da toqtaldy. Aldaǵy ýaqytta aýyl balalary aýdanda emes, aýylynda otyryp synaq tapsyrýy múmkin. Aýyl balalaryna grant bólý máselesi de qarastyrylady.
«Aqtóbedegi statıstıkany qarap otyrsam, jylyna aýyl mektepterinen myń bala bitiredi eken. Respýblıka boıynsha jylyna bar-joǵy birneshe myń oqýshy bitirse, olardy JOO túsirý máselesin qolǵa alamyz. Byltyr 10 myńnan astam grant Mańǵystaýǵa berildi. Olar bárin ıgere almady. Endi ony aýylda, shaǵyn jınaqty mektepte oqyp jatqan balalarǵa qaraı burýdy qolǵa alamyz», - dedi Ǵanı Beısembaev.
