Aýyl mektepteri arasynda arnaıy respýblıkalyq pán olımpıadasy ótedi

ASTANA. QazAqparat – QR Oqý-aǵartý mınıstri Ǵanı Beısembaev aýyl mektepterine qandaı qoldaý kórsetiletinin aıtyp berdi, dep habarlaıdy QazAqparat tilshisi.

«Qazaqstandaǵy bilim mekemelerin tsıfrlandyrý protsesin aýyl mektepterinen bastaýdy kózdep otyrmyz. Aýyl men qala mektepterindegi alshaqtyqty joıý úshin 2024 jyly tsıfrlandyrý bastalǵanǵa deıin bul mektepterdiń deńgeıin teńestirip úlgerýimiz kerek. Sonda 2024 jyly qyrkúıekte tsırflandyrý bastalǵanda aýyl mektepteri men qala mektepteriniń jaǵdaıy qatar deńgeıde bolady», - dedi mınıstr «Qazaqstan halqyna» qory uıymdastyrǵan «Bilimdi urpaq – bilimdi el» konferentsııasynda.

Onyń aıtýynsha, Oqý-aǵartý mınıstrligi aýyl mektepterin qoldaý maqsatynda birneshe sharalardy qarastyryp otyr.

«Jalpy elimizde 5 myńnan astam aýyl mektepteri bar. Bizdiń negizgi maqsatymyz – túbinde aýyl mektepteri jalpy qazaqstandyq bilim júıesiniń draıverine aınalýy kerek. ıAǵnı biz aýyl mektepterinde bilim joq, sapasy tómen degennen góri barlyǵy úlgi alatyndaı deńgeıge kóterýimiz kerek. Bul sheshim jańa ǵana qabyldanyp otyrǵan joq, ábden pisip, tolyq qabyldanǵan dúnıe. Bıyldan bastap aýyl mektepteri arasynda respýblıkalyq pán olımpıadasy uıymdastyrylady. Buǵan deıin kóp shaǵymdar boldy, aýyl balalary respýblıkalyq olımpıadalarǵa qatysa almaıdy, RFMM, NZM oqýshylarynyń arasynda kórinbeı qalady degen shaǵymdar bolǵan. Sondyqtan, áriptesterimizdiń bólek olımpıada kerek degen usynystaryn qabyldap, osyndaı jańalyqty engizip otyrmyz», - dedi Ǵ. Beısembaev.

Buǵan deıin mınıstr 340 dırektor jetispeýshiligi bar ekenin, 144 dırektor zeınet jasyna jaqyndap qalǵanyn aıtqan edi.

Aıta keteıik, elordada «Bilimdi urpaq – bilimdi el» konferentsııasy bastaldy. Bul sharany «Qazaqstan halqyna» qory uıymdastyrǵan.