Aýyl mektebiniń esepshisi men ustazy 25 mln-nan astam teńgeni jymqyrǵan - Pavlodar oblysy

PAVLODAR. QazAqparat - Aqtoǵaı aýdandyq soty bilim bóliminiń esep aıyrysý shotynan 2011 jyldyń qańtarynan bastap 2019 jyldyń sáýirine deıin iri kólemde aqsha jymqyrǵan esepshige qatysty úkim shyǵardy, dep habarlaıdy QazAqparat Pavlodarnews.kz-ke silteme jasap.

Aqtoǵaı aýdandyq baspasóz qyzmetiniń málimeti boıynsha, aýdan mektepteriniń birinde esepshi muǵalimmen birge óziniń qyzmettik babyn paıdalaný arqyly jalpy somasy 25 281 182 teńge somany qoldy etken. Onyń 10 118 338 teńgesin ózi, al 15 162 844 teńgeni birneshe adammen birge jymqyrǵan.

Esepshi ózine jáne sybaılasyna zańsyz túrde artyq aqsha eseptep, keıin banktik kartochkalyq shottarǵa aqsha aýdarǵan jáne ony qolma-qol aqshaǵa aınaldyryp, óz paıdalaryna jaratqan.

- Bul jaǵdaılar kýágerlerdiń aıǵaqtarymen, sot-ekonomıkalyq saraptamanyń jáne mamannyń qorytyndysymen, esep aıyrysý shotyndaǵy derektermen dáleldengen. Sottalýshy esepshi óziniń kinásin ishinara moıyndap, qarajatty sybaılasynyń ótinishi boıynsha avans retinde aýdarǵanyn túsindirdi. Ekinshisi kinásin moıyndamaı, aqshany esepshi ózi bergenin aıtqan, - dedi baspasóz qyzmetinde.

Prokýror esepshini 7 jyl, muǵalimdi 7 jyl 6 aı bas bostandyǵynan aıyrýdy surady.

Aqtoǵaı aýdandyq sotymen pedagog kináli dep tanylyp, oǵan alaıaqtyq úshin 5 jylǵa bas bostandyǵynan aıyrý, esepshige 6 jarym jylǵa kolonııada jazasyn óteý túrinde úkim shyǵaryldy.

Úkim men jeke qaýly zańdy kúshine endi.