Aýyl mektebi men bankke «bomba qoıǵan» eki aqmolalyq ustaldy

KÓKShETAÝ. QazAqparat - Aqmola oblysynda aýyl mektebine «bomba» qoıǵan 25 jastaǵy kúdikti ustaldy, dep habarlaıdy QazAqparat tilshisi.

Aqmola oblystyq PD baspasóz qyzmetiniń málimetinshe, oqıǵa 15 aqpanda saǵat 01:10 shamasynda bolǵan.

Bul týraly Shortandy aýdandyq PB kezekshi bólimine belgisiz adam habarlasyp, jergilikti orta mektepke jarylǵysh zat qoıylǵanyn aıtqan.

«Aıtylǵan mekenjaıǵa polıtsııa qyzmetkerleri jáne basqa da shuǵyl qyzmetter baǵyttaldy. Jarylǵysh zattarmen jumys isteıtin mamandar ǵımaratty tolyq súzip shyǵyp, kúdikti zatty tappady. Alaıda, sol kúni jalǵan málimet bergen adam anyqtaldy, ol 25 jastaǵy jergilikti turǵyn bolyp shyqty. Qyzdyń esepte turǵany jáne psıhıkalyq aýrýmen aýyratyny belgili boldy, biraq jarylǵysh qurylǵy týraly ádeıi habarlaǵan. Bul derek Qylmystyq kodekstiń 273-baby boıynsha tirkeldi (terrorızm aktisi týraly kórineý jalǵan habarlama)», - dedi vedomstvodan.

Sonymen birge, osyndaı jalǵan aqparat berý deregi 13 aqpanda Astana qalasynda tirkeldi.

Bul rette Aqkól aýdanynyń 34 jastaǵy turǵyny ustaldy.

Ol elordadaǵy bank fılıaldarynyń birine elektrondy poshta arqyly «bomba qoıylǵany» týraly habarlama jibergen.

«Qazirgi ýaqytta polıtseıler er adamdy osyndaı habarlama jiberýge ne ıtermelegenin muqııat tekserip jatyr. Kúdikti osy banktiń klıenti ekeni anyqtaldy», - dep tolyqtyrdy vedomstvodan.

Osy rette tártip saqshylary Qylmystyq kodekstiń 273-babynyń sanktsııasyna sáıkes jalǵan habarlamanyń avtorlary bes jylǵa deıin bas bostandyǵynan aıyrý jazasyna kesiletinin eske salady.

Aıta ketsek, buǵan deıin Kókshetaýda janarmaı quıý beketinde jarylys bolyp, operator qaza tapqan edi.