Aýyl mártebesi beriletin qalalarda bıýdjet qyzmetkerleriniń aılyǵy ósedi

NUR-SULTAN. QazAqparat – Májilis depýtaty Álııa Saparova aýdandyq mańyzy bar qalalarǵa aýyl mártebesin berýdiń arqasynda aýyldyń bıýdjettik qyzmetkerleriniń aılyǵy kóbeıetinin málimdedi, dep habarlaıdy QazAqparat tilshisi.

Eske sala ketsek, Májilis depýtaty Álııa Saparova Parlament Májilisinde «QR-nyń keıbir zańnamalyq aktilerine óńirlerdiń ákimshilik-aýmaqtyq qurylysyn jetildirý máseleleri boıynsha ózgerister men tolyqtyrýlar engizý týraly» zań jobasyn tanystyrǵan bolatyn. Zań jobasyna sáıkes elimizdegi 13 aýdandyq mańyzy bar qalaǵa aýyl mártebesi beriledi.

Zań jobasyn talqylaý barysynda Amangeldi Dáýrenbaev bul ózgeristerden turǵyndardyń áleýmettik-ekonomıkalyq jaǵynan ne utatynyn surady. Óz kezeginde Álııa Saparova aýdandyq mańyzy bar qalalardyń (keıin aýyl mártebesine ózgeretin) qazirgi turǵyndary qandaı artyqshylyqqa ıe bolatynyn naqty aıtyp berdi.

«Aýdandyq mańyzy bar qalaǵa aýyl mártebesi berilse birinshiden aýyldarda eńbek etetin densaýlyq saqtaý, mádenıet, bilim, áleýmettik qamsyzdandyrý, sport salasyndaǵy qyzmetkerlerdiń jalaqysyna 25 paıyzdyq ústemeaqy qosylady. Ekinshiden aýyldaǵy mektepterdiń túlekterine oqýǵa túsý úshin qabyldaý kvotasy qarastyrylǵan. Sondaı-aq aıta keterligi, osyndaı baǵdarlamalardyń biri – «Dıplommen aýylǵa» baǵdarlamasy aıasynda aýyldy eldimekenderge kelip jatqan jas mamandarǵa memlekettik qoldaý kórsetiledi. Atap aıtqanda olarǵa kóterme járdemaqy men turǵyn úı alý úshin bıýdjettik nesıe beriledi», - dedi ol.

Áıtse de, óz kezeginde Ulttyq ekonomıka vıtse-mınıstri Ermek Alpysov aýdandyq mańyzy bar qalalarǵa aýyl mártebesin berý máselesi tek turǵyndardyń jıyny arqyly sheshiletinin, ıaǵnı sondaǵy halyqtyń pikiri eskeriletinin málimdedi.