Aýyl mańyndaǵy jaıylym tapshylyǵy qalaı sheshiledi

NUR-SULTAN. QazAqparat – Májilistiń jalpy otyrysynda QR Aýyl sharýashylyǵy birinshi vıtse-mınıstri Aıdarbek Saparov aýyl mańyndaǵy jaıylym tapshyǵy máselesi qalaı sheshiletinin aıtty, dep habarlaıdy QazAqparat tilshisi.

Aıta keteıik , búgin palatanyń jalpy otyrysynda «Qazaqstan Respýblıkasynyń keıbir zańnamalyq aktilerine jer qatynastaryn damytý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.

«Qazirgi zań jobasynda aýyldyń mańyndaǵy jaıylym jerler aýyldyń malyn baǵý úshin bólinetin bolady. Biraq maldyń sanyna baılanysty shekarasy belgilenedi. Eger ol jer buryn bireýge jekemenshikke berilse, onda ony baǵalaý júrgiziledi. Sodan qaıta satyp alynady. Sondaı-aq bul jer jalda bolsa, onda dál osyndaı alqaptaǵy jer basqa egistikten beriledi. Infraqurylymdyq shyǵyndar tirkelse (qudyq nemese basqa nysandar), bunyń barlyǵy baǵalanyp, shyǵyny qaıtarylady. Meniń oıymsha, bul jaqsy sheshim bolady. Búginde mal baǵatyn jer problema ekeni belgili», - dedi birinshi vıtse-mınıstr Májilistiń jalpy otyrysynda.

Zań jobasynyń negizgi ózgeristeri men tolyqtyrýlary:

- qazaqstandyqtarǵa jáne qazaqstandyq zańdy tulǵalarǵa aýyl sharýashylyǵy maqsatyndaǵy jerlerdi 49 jylǵa deıingi merzimge jalǵa berý;

- Jer resýrstaryn basqarý komıtetine jerdi paıdalaný men qorǵaýdy memlekettik baqylaý fýnktsııalaryn ákimdikterden qaıtarý;

- aýyl sharýashylyǵy jerleriniń nysanaly maqsatyn «baǵbandyq» jáne «saıajaı qurylysyna» ózgertýge tyıym salý;

- halyqtyń muqtajyn qanaǵattandyrý maqsatynda, jergilikti jaǵdaılardy eskere otyryp, jaıylymdardy basqarý jónindegi josparlarda, qajetti jaıylym alqabynyń shekarasyn aıqyndaý;

- aýyl sharýashylyǵy maqsatyndaǵy jerlerdi jeke menshikke berýge moratorııdiń qoldanylý merzimin 2026 jylǵy 31 jeltoqsanǵa deıin uzartý.