Aýyl kvotasymen bilim alǵandar óz mindetterin oryndap júr me

ASTANA. QazAqparat - Búgin Astanada QHA depýtattyq tobynyń otyrysynda Parlament Májilisi tóraǵasynyń orynbasary Vladımır Bojko aýyl kvotasymen JOO-da bilim alǵandardyń tek 43 paıyzy aýylda jumys isteýge baratynyn aıtty, dep habarlaıdy QazAqparat.

«2022 jylǵa qaraı aýyldaǵy ónimdilik deńgeıin 2,5 esege arttyrý usynyldy. Sonymen birge, aýyldyq jerlerde eńbekaqy deńgeıi tómen bolyp tur. Keıbir málimetterge qaraǵanda, sońǵy 5 jylda traktorlar men kombaındar quny eki esege, al aýyl sharýashylyǵy jabdyqtary baǵasy 1,9 esege artqan. Qajetti kólemde tyńaıtqyshtar sebilmegendikten, egis alqaptarynda topyraq quramy tozyp jatyr. Tehnıkanyń jartysynan astamy 18 jyldan beri paıdalanylyp keledi. Sonymen qatar, joǵary oqý oryndarynda aýyl kvotasymen bilim alyp jatqan jastardyń tek 43 paıyzy ǵana eldi mekenderge oralyp jatyr, sondaı-aq  olardyń jumyspen qamtylýy deńgeıi de kóńil kónshitpeıdi», - dedi Vladımır Bojko.

Osy oraıda, ol Májilistegi QHA depýtattyq toby aldaǵy aptada óńirlerge jasaǵan sapary kezinde atalǵan máselelerge erekshe mán berýi qajettigin jetkizdi.

«Aýyldarda dárigerlerdiń, muǵalimderdiń, veterınarlardyń, pedagogtardyń, mehanızatorlardyń jáne basqa da kásip ıeleriniń jetispeýshiligi baıqalyp otyr», - dedi Májilis tóraǵasynyń orynbasary.

Budan buryn habarlanǵandaı, 17-27 qazan aralyǵynda Qazaqstan halqy Assambleıanyń depýtattyq toby óńirler saparmen bolady.  Osy oraıda QHA-nyń depýtattyq toby QHA Hatshylyǵymen birlese Memleket basshysy Joldaýyn tıimdi júzege asyrý máselelerine ekpin qoımaq. 

Sonymen qatar, depýtattar óńirlerge saparlaǵan kezde balabaqshalardyń beınebaqylaý qurylǵylarymen jabdyqtalýyna nazar aýdarady. 

Aıta keteıik, jaqynda Májiliste ótken talqylaý kezinde ne sebepti keıbir aýdan ortalyqtaryna jas mamandar barmaıtyndyǵy aıtylǵan edi.