Aýyl kásipkerleri kepilge usynatyn múlik quny tómendedi: Halyq mınıstrge shaǵymdandy

ATYRAÝ. QazAqparat – Atyraý oblysynyń kásipkerleri Ulttyq ekonomıka mınıstri Álibek Qýantyrovpen kezdesýde aýyldaǵy kepildik múlik qunynyń tómendigine shaǵymdandy, dep habarlaıdy QazAqparat tilshisi.

Ulttyq ekonomıka mınıstri Atyraý oblysynyń birneshe nysanyn aralap, oblys máslıhatynyń depýtattarymen, kásipkerlermen kezdesti.

Jergilikti kásipkerlerdiń aıtýynsha, ınfraqurylym júrgizý jobalaryn qarjylandyrý ózekti máselege aınalyp otyr. Óıtkeni, kásipkerlikti damytý jónindegi ulttyq jobanyń sharttaryna sáıkes, ınvestıtsııa kólemi 200 mln teńgeden kem bolmaýy tıis. Bul shaǵyn jáne orta bıznes sýbektileri úshin qıyndyq týdyrady.

Osyǵan baılanysty kásipkerler quny 50 mln teńgege deıingi joba úshin jergilikti bıýdjetten ınfraqurylym júrgizýdi qarjylandyrý tetigin qurýdy usyndy. Sondaı-aq jergilikti bıýdjetten jobalaý-smetalyq qujattamanyń jáne tehnıkalyq-ekonomıkalyq negizdemeniń shyǵystaryn óteý tártibin, shaǵyn bıznes sýbektileri úshin ınfraqurylymdy júrgizýdiń arnaıy tetigin engizýdi usyndy.

«Biz bárine emes, keıbir usynystarǵa qoldaý bildire alamyz. Sebebi, bul bıýdjetke aýyrlyq túsiredi. Tikeleı táýekelder túrindegi shyǵyndar men jumystardyń belgili bir bóligin bıznes kóterýi kerek. Biz básekege qabiletti ekonomıkaǵa kóshýimiz qajet. Mıkrobıznes úshin jergilikti bıýdjetten arnaıy tetikter berý máselesin qarastyramyz», -dedi Álibek Qýantyrov.

Kásipkerler ekinshi deńgeıli bankter aýyldyq jerlerdegi kepil qunyn tómen baǵalaıtynyna shaǵymdanyp otyr. Al jobalar baıaý qaralady. Bul aýyldardaǵy iskerlik belsendiliktiń álsireýine ákep soqtyrady. Sol sebepten, kásipkerler ulttyq jobaǵa mańyzdy ólshemsharttar belgilengen aýyl kásipkerlerin nesıelendirý jónindegi bólimdi qosymsha engizýdi qalaıdy.

«Shynynda da, ekinshi deńgeıli bankter kepildi múlik qunyn naqty qunynan 30-dan 50% deıin tómendetedi. Atalǵan máselemen ýákiletti organ aınalysady. Bıyl 2020-2025 jyldarǵa arnalǵan bıznestiń jol kartasy sheńberinde qosymsha kredıtteý men sýbsıdııalaýǵa 260 mlrd teńge qarastyrylǵan. Bul ótken jylmen salystyrǵanda 100 mlrd teńgege kóp. Aýyldarda jumys oryndaryn qurý qajet. «Aýyl amanaty», «Aýyl – el besigi» baǵdarlamalarymen aýyldardy damytýǵa jaǵdaı jasaý qajet», - dedi mınıstr.