Aýyl ınfraqurylymyn damytý úshin óńirlik standarttar engiziledi - Rýslan Dálenov
Bul týraly búgin Úkimet otyrysynda Óńirlerdi damytýdyń 2020-2025 jyldarǵa arnalǵan memlekettik baǵdarlamasynyń jobasyn tanystyrǵan Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.
«Óńirlerdi damytý baǵdarlamasy 2014 jyldan bastap iske asyrylýda. Ol aglomeratsııalardy, mono- jáne shaǵyn qalalardy, sondaı-aq damý áleýeti joǵary aýyldardy damytý máselelerin qamtıdy. Jańa baǵdarlamada basymdyqtar qalalyq ósý ortalyqtaryn – tórt iri aglomeratsııany jáne óńirlik ýrbandalǵan aımaqtardy, sondaı-aq tirek jáne spýtnıktik aýyldardy damytýǵa baǵyttalǵan. Bul eldiń barlyq óńirlerin damytýǵa jáne óńirlerdegi ómir súrý sapasyn arttyrýǵa múmkindik beredi. Resýrstardy shoǵyrlandyrý ekonomıkalyq ósimdi ulǵaıtýǵa múmkindik beredi. Qalalarda, aýdan ortalyqtarynda jáne aýyldarda ınfraqurylymdy damytý úshin Óńirlik standarttar júıesi engiziletin bolady», - dedi ol.
Onyń atap ótýinshe, baǵdarlamanyń birinshi besjyldyǵy osy jyly aıaqtalady. Bes jyldyq baǵdarlamanyń júzege asyrylý nátıjesinde Nur-Sultan, Almaty, Aqtóbe jáne Shymkent qalalary men olarǵa irgeles eldi mekenderdiń halyq sany 1 mln adamǵa artty. Monoqalalarda sýmen jabdyqtaý jelileriniń tozýy 10 jáne elektr jelileriniń tozýy 12 paıyzǵa tómendedi. Bes jyl ishinde 17 myń mamanǵa «Dıplommen aýylǵa» baǵdarlamasy boıynsha turǵyn úı satyp alýǵa jeńildetilgen bıýdjettik kredıt berildi. Aýyldardy abattandyrý boıynsha 8 myń joba iske asyryldy. 700 myńǵa jýyq aýyl turǵyndary úshin ınfraqurylym jaqsardy.
«Atalǵan is-sharalarǵa barlyǵy 252 mlrd teńge bólindi. Sondaı-aq, sýmen jabdyqtaýdy jáne turǵyn úı salýdy damytý boıynsha is-sharalar júrgizildi. 2017 jyldan bastap turǵyn úı salý boıynsha is-sharalar «Nurly jer» baǵdarlamasyna biriktirildi. 2020 jyldan bastap sýmen jabdyqtaý, sý burý jáne turǵyn úı-kommýnaldyq sharýashylyq máseleleri de «Nurly jer» baǵdarlamasy aıaynda iske asyrylatyn bolady. Osy bes jylda ınjenerlik ınfraqurylymdy damytýǵa 1,4 trln teńge bólindi«, - dedi Rýslan Dálenov.
