Aýyl halqynyń tabysyn arttyrý jobasy boıynsha Atyraý oblysyna 1,5 mlrd teńge bólinedi

ASTANA. QazAqparat - Bıyl Atyraý oblysynyń mal sharýashylyǵyn damytýǵa 2,8 mlrd teńge bólindi. Oblysta 550 sharýa qojalyǵy memleketten sýbsıdııa aldy, onyń ishinde jemshóp qunyn arzandatýǵa berildi.

QR Aýyl sharýashylyǵy mınıstrligi baspasóz qyzmetiniń habarlaýynsha, aldaǵy qysqa óńirde 570 myń tonnadan astam kólemde jem-shóp qory ázirlendi.

Aýyl sharýashylyǵy vıtse-mınıstri Ábilhaıyr Tamabektiń óńirge jumys sapary kezinde Atyraý oblysynda AÓK salasyn damytý týraly aıtyldy. Ábilhaıyr Tamabek jergilikti aýyl turǵyndaryna Qazaqstandaǵy aýyl halqynyń tabysyn arttyrý jónindegi jobanyń bekitilgeni týraly aıtty. Osy baǵdarlama aıasynda aýyl turǵyndary óz isin damytýǵa tómen paıyzben shaǵyn nesıeler ala alady. Joba aıasynda Atyraý oblysyna 1,5 mlrd teńge bólinedi.

«Aýyl turǵyndaryn shaǵyn nesıelendirý baǵdarlamasyna qatysýǵa shaqyramyn. Syıaqynyń nomınaldy mólsherlemesi 2,5%, nesıe 7 jyldan aspaıtyn merzimge beriledi. Qaryzdyń eń joǵary somasy 2,5 myń AEK, bul shamamen 7,9 mln teńgeni quraıdy. Aýyl sharýashylyǵy kooperatsııalary úshin erekshe jaǵdaılar qarastyrylǵan, qaryzdyń eń joǵary somasy 8 myń AEK nemese shamamen 25,4 mln teńge», - dedi Ábilhaıyr Tamabek.

Jalpy, Memleket basshysynyń saılaýaldy baǵdarlamasyn iske asyrý jónindegi is-qımyl jospary sheńberinde barlyq jeke qosalqy sharýashylyqtardyń jartysyn kooperatıvtik kásipkerlikke tartý jáne shaǵyn nesıeleý esebinen mıllıon aýyl turǵyndaryn qamtı otyryp, 350 myńnan astam jumys ornyn qurý josparlanyp otyr.

Sonymen birge vıtse-mınıstr oblystyń birqatar fermerlik kásiporyndaryna bardy. Qazaqstannyń batysyndaǵy iri kásiporyn «Karat» JShS un tartý kásiporny, sondaı-aq eshki ósirýmen jáne eshki sútin óńdeýmen aınalysatyn «Saraıshyq» asyl tuqymdy sharýashylyǵynda boldy.

Aıta keteıik, bul kompanııa jylyna shamamen 180 tonna sút jáne 140 tonna sút ónimderin óndiredi.

Foto: gov.kz