Aýyl gúldense, jastar týǵan jerine oralady – vıtse-premer

NUR-SULTAN. QazAqparat – Aýyl gúldense, qalada bilim alǵan jastar týǵan jerine oralady. Almatyda «AMANAT» partııasy «Jastar Rýhynyń» kezekten tys VI Sezi aıasyndaǵy «Jas Talks» ashyq dıalog alańynda Premer-Mınıstrdiń orynbasary Eraly Toǵjanov osyndaı oı aıtty, dep habarlaıdy QazAqparat.

«Aýyldyń máselesin sheship almaıynsha, qalanyń máselesi sheshilmeıdi. Azyq-túlik qaýipsizdiginen ózge, kóshi-qon máselesi de bar. Aýyl gúldense, qalada bilim alǵan jastar týǵan jerine oralady. Memleket qandaı jaǵdaı jasasa da, ár adam túpki sheshimdi jumys isteýge degen jeke qalaýyna qaraı qabyldaıdy. Árkim ózine, jaqynyna, istegen isine jaýapkershilikpen qaraı bastaǵan kezde budan da gúldengen qoǵamda ómir súretin bolamyz», - dep atap ótti Eraly Toǵjanov.

Vıtse-premer «AMANAT» partııasymen birlese júzege asyrylyp jatqan «Aýyl amanaty» jobasyna egjeı-tegjeıli toqtaldy.

Óz kezeginde, jastar jasóspirimder sportyn damytý, JOO-da óndiristik tájirıbeni jetildirý, jas kásipkerlerdi qoldaý jáne basqa da máseleler jóninde suraq qoıyp, usynys bildirdi.

Esterińizge sala keteıik, Sezdiń plenarlyq otyrysy barysynda jastar qanatyn transformatsııalaýdyń jańa baǵdarlamasy qabyldanyp, Ortalyq keńestiń quramy jańardy. Sondaı-aq, jastar uıymynyń ataýy «Jastar rýhy» bolyp ózgertildi.