Aýyl feldsheri men tártip saqshysy tolǵaǵy qysqan kelinshekti bosandyryp aldy - SQO
PETROPAVL. QazAqparat – Soltústik Qazaqstan oblysynda aýyl feldsheri men tártip saqshysy tolǵaǵy kelgen áıeldi aman-esen bosandyryp, er balanyń kindigin kesti, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, M.Jumabaev aýdany Roşıno eldi mekeniniń feldsheri saǵat keshki 19.00 shamasynda kórshi Hleborobnoe aýylyndaǵy saılaý ýchaskesinde kezekshilikte turǵan polıtsııa qyzmetkerinen kómek suraıdy. Medıtsına qyzmetkeriniń aıtýynsha, ol aýdan ortalyǵy Býlaev qalasyna tolǵaǵy bastalǵan 34 jastaǵy kelinshekti alyp shyqqan. Alaıda aýdandyq aýrýhanaǵa jete almaıtyndyǵyna alańdap, jaqyn mańdaǵy medıtsınalyq pýnktke toqtaǵan.
Jergilikti feldsher-akýsherlik pýnkti men saılaý ýchaskesi mektep ǵımaratynda ornalasqan eken. Feldsher sol jerde júrgen polıtsııa kapıtany Olga Kangozınadan kómek suraıdy. Tártip saqshysy dereý jedel járdem shaqyrǵan. Alaıda kelinshek bosanatyn bolǵasyn, aýdandyq aýrýhanadaǵy dárigerge qońyraý shalyp, sonyń nusqaýy boıynsha áreket ete bastaıdy. Nátıjesinde ómirge shekesi torsyqtaı ul dúnıege keldi.
«Men áli kúnge deıin óz-ózime kele almaı júrmin. Qaıshyny dezınfektsııalap, balanyń kindigin kestim. Er bala eken. Óltirip alamyz ba dep jaman qoryqtym. Bala týǵannan keıin esh dybys shyǵarmady. Arqasynan qaqqannan keıin ǵana shyr ete tústi. Sonda ǵana kelinshekti aman-esen bosandyrǵanymyzǵa kózim jetti», - deıdi 8 qańtar kúni keshke bolǵan oqıǵa jaıly Olga Kangozına.
Olga ózi 11 jyl buryn dúnıege qyzyn ákelgen eken. Akýsher-dárigerlerdiń aıtqandaryn esine túsirip, solardy áıelden bosaný kezinde oryndaýyn suraǵan. Sábı dúnıege kelgennen soń, birneshe mınýttan keıin aýdannan jedel járdem kelip jetti. Shaqalaqty baýyryna qysqan jas ana dáriger jáne polıtsııa kapıtanymen tipti estelikke sýretke túsip te úlgerdi.
Jedel ýákil Olga Kangozınanyń aıtýynsha, onyń bul quqyq qorǵaý organdaryna kelgenine 5 jyl bolǵan. Osy aralyqta jumys barysynda túrli oqıǵalardy bastan keshirgen. Tergeýshi bolyp jumys istep, qylmyskerlermen de betpe-bet kelgen.
«Osy qyzmet etken jyldardaǵy eń qıyny áıeldi bosandyrý boldy. Shynymdy aıtsam, qatty qoryqtym. Qolymnan kele me, joq pa degen oı múldem bolǵan joq», - deıdi tártip saqshysy.
Al, dúnıege kelgen náreste erli-zaıyptynyń úshinshi balasy, áke-sheshe esimin Danaly dep qoıǵan eken. Sábı anasymen birge aýrýhanadan shyǵyp, úıine barýǵa daıyndalyp jatyr.
