«Aýyl – el besigi» jobasynyń arqasynda Qaraǵandy aýyldarynda qandaı ózgerister boldy

QARAǴANDY. QazAqparat – Jaqsy joldar, jańartylǵan mektepter men klýbtar, Áleýmettik jáne ınjenerlik ınfraqurylymdy damytý – osy ıgilikter aýyl turǵyndaryna «Aýyl – el besigi» arnaıy jobasynyń arqasynda kórsetilip jatyr. Eki jyl ishinde Qaraǵandy oblysynda baǵdarlama boıynsha 73 joba iske asyryldy. 2021 jyly taǵy 60 joba júzege asady, dep habarlaıdy QazAqparat tilshisi.

«Aýyl – el besigi» aıasyndaǵy jumystar týraly onlaın rejımde ótken apparattyq keńeste aıtyldy.

«2019–2020 jyldar ishinde 16 aýyldyq eldi mekende 73 joba iske asyryldy. Áleýmettik nysandar: mektepter, balabaqshalar, aýrýhanalar, mádenıet úıleri men sport keshenderi, sondaı-aq kentishilik joldar, sý jáne elektrmen jabdyqtaý jelileri jóndeldi», – dep baıandady ekonomıka basqarmasynyń basshysy Azamat Muqanov.

Jumystar segiz aýdanda júrgizildi: Jańaarqa, Nura, Ulytaý, Aqtoǵaı, Buqar Jyraý, Qarqaraly, Osakarov, Shet.

Bıyl 33 eldi mekende 60 joba iske asyrylyp jatyr.

Botaqara kentinde 320 oryndyq dene shynyqtyrý-saýyqtyrý kesheni salynyp jatyr. Aqtoǵaıda mádenıet jáne demalys saıabaǵyn qaıta jańǵyrtý jumysy bastaldy.

Shahterskıı aýylynda hokkeı korty paıda bolady.

Aqtaılaq aýylyndaǵy medpýnkt, Topar kentindegi aýdandyq aýrýhananyń juqpaly aýrýlar bólimine kúrdeli jóndeý jumystary aıaqtalýda.

«Aýyl – el besigi» – 2019 jyldan beri júzege asyrylyp kele jatqan mańyzdy baǵdarlamalardyń biri.

Onyń kómegimen aýyldardyń ınfraqurylymyn damytý belsendi júrip jatyr. Mysaly, Osakarovka kentinde kósheler júz paıyz asfalttalyp, jaryqtandyryldy. Mektepter, medıtsınalyq mekemeler jóndeldi. Egindibulaqta DSK salynýda, mektep pen mádenıet úıin jóndeýge, kóshelerdi asfalttaýǵa qarajat bólindi. Kelesi jyly arnaıy jobany iske asyrý jalǵasatyn bolady. Sondaı-aq, birqatar eldi mekenderdi qamtýdy josparlap otyrmyz», – dep atap ótti oblys ákimi Jeńis Qasymbek.

Óńir basshysy barlyq jobalardyń ýaqytyly tapsyrylýyn jáne jumys sapasyn baqylaý boıynsha tapsyrmalar berdi.