«Aýyl - el besigi» jobasyna bıyl 143 mıllıard teńge bólindi

ASTANA. QazAqparat – 2023 jyly memeleket menshigine 5 mıllıon gektar jer qaıtarylmaq. Bul týraly Premer-Mınıstrdiń birinshi orynbasary Roman Sklıar málim etti, dep habarlaıdy QazAqparat tilshisi.

«Aýyldy damytýdyń aldaǵy 5 jylǵa arnalǵan tujyrymdamasy ázirlendi. Sondaı-aq aýyl sharýashylyǵyn damytý baǵytynda da keshendi jumystar júrgizilip jatyr. 2022 jyly aýyl sharýashylyǵy salasy joǵary ósý qarqynyn kórsetti, jalpy ónim kólemi 9 protsentke ósti. Keıingi 10 jylda biz astyq daqylynan eń joǵary ónim aldyq», - dedi R. Sklıar Senattaǵy «Tıimdi óńirlik saıasat – elimizdiń ornyqty áleýmettik-ekonomıkalyq damýynyń negizi» taqyrybyndaǵy parlamenttik tyńdaýda.

Onyń aıtýynsha, 5,2 mıllıon gektar aýyl sharýashylyǵy jeri memleket menshigine ótti. 2023 jyly taǵy 5 mıllıon gektar jer qaıtarylmaq.

«Budan bólek, jalpy syıymdylyǵy 201 myń tonna kókónis saqtaý qoımasy iske qosyldy. Azyq-túlik qaýipsizdigi jospary men qant ónerkásibin damytýdyń keshendi jospary qabyldandy. Nátıjesinde azyq-túlik óndirisi 4 protsentke ósti», - dedi Úkimet basshysynyń birinshi orynbasary.

Sonymen qatar ol «Aýyl – el besigi» jobasyn júzege asyrý nátıjesine toqtaldy.

«Ótken kezeńde (2019-2022) 326 mlrd teńge bólinip, 4 myńǵa jýyq joba júzege asyryldy. Bul óz kezeginde 334 turǵyn úı-kommýnaldyq, 1,2 myń áleýmettik ınfraqurylym nysanyn jáne 2 myń kólik ınfraqurylymy jobasyn jańǵyrtýǵa múmkindik berdi. Keıingi jyldary barlyǵy 1031 aýyl arnaıy jobalarmen qamtyldy. «Aýyl - el besigi» jobasy boıynsha bıyl 736 aýyl úshin 1,5 myńnan astam jobaǵa 143 mıllıard teńge bólindi. 119 turǵyn úı-kommýnaldyq nysany, 275 áleýmettik ınfraqurylym nysany jáne 1 myń kólik ınfraqurylymy jobasy jańǵyrtylady», - dedi R. Sklıar.