«Aýyl - el besigi» jobasyn iske asyrý algorıtmderi bekitildi
«Jobany tıimdi iske asyrý úshin múddeli memlekettik organdarmen birlesip kelesi is-qımyl algorıtmi ázirlendi. Osy algorıtmder boıynsha joba naqty júzege asyrylatyn bolady. Birinshiden, damý áleýeti men aǵymdaǵy ekonomıkalyq jaǵdaıdy taldaý negizinde osy jyly iske asyrylatyn jobalary bar tirek aýyldyq eldi mekenderdi irikteý júrgizildi. Ekinshiden, árbir joba jáne eldimeken boıynsha maqsattarǵa qol jetkizý jóninde jol kartasy ázirlendi. Úshinshiden, jobalardy iske asyrý jáne baqylaý qurylǵan Qoǵamdyq úılestirý keńesiniń negizinde múddeli memlekettik organdar men «Nur Otan» partııasyn tarta otyryp júzege asyrylatyn bolady», - deıdi OKQ-da ótken baspasóz máslıhatynda Ulttyq ekonomıka vıtse-mınıstri Ermek Alpysov.
Tórtinshiden, júrgizilgen jumystyń nátıjeleri týraly halyqty turaqty habardar etý josparlanyp otyr.
«Sondaı-aq, halyqaralyq sarapshylarmen birlesip, kelesi jyldary aýyldyq eldi mekenderge (AEM) basymdyq berý úshin kórsetkishterdi esepteýdiń ádistemesi men modelderi jetildiriledi. Qajetti ınvestıtsııalardy baǵalaý, ıaǵnı aýyl aýmaqtaryndaǵy óńirlik ınfraqurylymdyq standarttardyń sapaly deńgeıine qol jetkizý úshin qajettilikti jáne odan ári qarjylandyrý kózderin aıqyndaý máseleleri pysyqtalýda», - deıdi ol.
Vıtse-mınıstrdiń aıtýynsha, halyqtyń ómir súrýiniń qolaıly ortasyn qurý úshin UEM jaýapty memorgandarmen biryńǵaı buıryqpen óńirlik standarttar júıesin bekitken.
Eske sala ketsek, buǵan deıin Úkimet otyrysynda Premer-mınıstrdiń orynbasary «Aýyl - el besigi» jobasy boıynsha aýdan ortalyqtaryna 670 mln teńgeden bólinetinin aıtqan edi. Ulttyq ekonomıka mınıstrligi elimizdegi 163 aýdan ortalyǵynyń 122-i aýyldyq eldi meken mártebesine ıe ekenin habarlaıdy.
Aıta ketsek, byltyr Elbasy Nursultan Nazarbaev Qazaqstan halqyna Joldaýynda aýyldyq jerlerdi qoldaý maqsatynda «Aýyl - el besigi» jobasyn iske asyrýdy tapsyrǵan bolatyn.
