«Aýyl – el besigi» jobasy aıasynda aıaqtalǵan jobalar ataldy

NUR-SULTAN. QazAqparat – Bıyl «Aýyl - el besigi» jobasy aıasynda 480 aýyldy damytýǵa 106 mlrd teńge bólindi. Bul týraly atalǵan jobanyń oryndalýy jaıynda baıandaǵan QR Ulttyq ekonomıka mınıstri Áset Erǵalıev aıtty, dep habarlaıdy QazAqparat tilshisi.

«Bıyl «Aýyl - el besigi» jobasy aıasynda 480 aýyldy damytýǵa 106 mlrd teńge bólindi. Osy jyldyń 1 qazanyna qarjylandyrý josparyna sáıkes ıgerilgeni 96 paıyzdy quraıdy. Búginde keıbir óńirlerde aıaqtalǵan jobalardyń úlgileri bar. Máselen, Qostanaı oblysynyń Uzynkól aýylynda dene shynyqtyrý-saýyqtyrý kesheni salyndy», - dedi mınıstr Úkimet otyrysynda.

Onyń atap ótýinshe, Pavlodar oblysynyń Qyzyljar aýylynda aýysymyna 100 kelýshige arnalǵan dárigerlik ambýlatorııa paıdalanýǵa berildi. Qyzylorda oblysynda Jalaǵash aýylyndaǵy joldarǵa jóndeý jumystary júrgizildi. Jambyl oblysynda Aısha-bıbi aýylyndaǵy mekteptiń kúrdeli jóndeý jumystary aıaqtaldy.

«Jalpy, 2019-2021 jyldary memlekettik baǵdarlamalar boıynsha jáne jeke ınvestıtsııalar esebinen aýyldyq aýmaqtardy damytýǵa 1,2 trln teńge baǵyttaldy», - dedi Áset Erǵalıev.