«Aýyl – el besigi» jobasy aıasynda 70 myń otbasylyq sharýashylyq qurylady - Erǵalıev

NUR-SULTAN. QazAqparat – 2025 jylǵa qaraı «Aýyl – el besigi» jobasy aıasynda 70 myń otbasylyq sharýashylyq qurylady. Bul týraly Úkimet otyrysynda QR Ulttyq ekonomıka mınıstri Áset Erǵalıev aıtty, dep habarlaıdy QazAqparat tilshisi.

«Agroónerkásiptik keshen salasynda 4,5 trln teńge somasyna 934 ınvestıtsııalyq joba iske asyrylatyn bolady. 600 myń gektar jańa sýarmaly jerdi aınalymǵa tartý 70 myń otbasylyq sharýashylyq qurýǵa múmkindik beredi. Aýyl sharýashylyǵyndaǵy eńbek ónimdiligi 2,5 ese artady», - dedi Áset Erǵalıev atalǵan jobanyń oryndalýy jaıynda baıandaı kele.

Mınıstrdiń aıtýynsha, qaıta óńdelgen ónimniń úlesi 70 paıyzǵa deıin jetkizilip, agroónerkásip kesheni ónimderiniń eksporty 2 esege ulǵaıtylady.

«7 iri júıeniń ekojúıesin qalyptastyrý esebinen 1 mln aýyl turǵynynyń tabysyn turaqty arttyrý qamtamasyz etiledi. 500 myń jumys orny qurylady. «Aýyl - el besigi» jobasyn iske asyrý aýyl halqynyń ómir súrý sapasy men ál-aýqatyn arttyrýdy qamtamasyz ete otyryp, aýyldyq aýmaqtardy damytýǵa jańa serpin beredi», - dedi ol.

Aıta keteıik, aldaǵy 4 jylda «Aýyl – el besigi» jobasy aıasynda 3,5 myń aýyldy damytýǵa 670 mlrd teńge jumsalady.