«Aýyl – el besigi»: Jambyl oblysynda bıyl 119 joba júzege asyrylýda
Aldymen Jambyl aýdany Asa aýylyndaǵy Muqan Tólebaev atyndaǵy balalar óner mektebine barǵan mınıstr mekemeni aralap, jaı-kúıin kórdi. Ǵımarattyń irgetasy 1975 jyly qalanyp, birshama jyl kınoteatr retinde halyqqa qyzmet kórsetip kelgen. Ondaǵan jyl boıy bos turǵan nysanǵa sońǵy jyldary «Aýyl – el besigi» jobasy aıasynda kúrdeli jóndeý jumystary júrgizilip, 2019 jyly paıdalanýǵa berildi. Óner mektebinde 102 qyzmetker eńbek etse, 11 úıirme boıynsha 1 462 bala qosymsha bilim alýda. Aýdanǵa qarasty eldi mekenderde óner mektebiniń 5 fılıaly ashylǵan.
Jalpy aýdanda eki jylda «Aýyl – el besigi» aıasynda 1,3 mıllıard teńgege 45 joba iske qosylǵan. Mınıstr budan basqa da birqatar nysannyń jumysymen tanysty.
Budan keıin mınıstr Taraz qalasyndaǵy «Araı» massıvindegi «Imperııa» áleýmettik dúkeninde bolyp, áleýmettik mańyzy bar azyq-túlik taýarlarynyń baǵasyna nazar aýdardy.
Óńirde oblys ákiminiń tapsyrmasyna sáıkes baǵany turaqtandyrý úshin aýqymdy jumystar atqarylýda. Máselen, Taraz qalasynda ǵana emes, aýdan ortalyqtarynda áleýmettik dúkender ashyldy. Búgingi tańda oblys ortalyǵynda – 17, aýdandarda 15 áleýmettik dúken jumys isteıdi. Sondaı-aq aýyl sharýashylyǵy taýar óndirýshileri «Alqaptan sórege deıin» jobasymen ónimderin iri saýda ortalyqtaryna ótkizip, halyqty jergilikti ónimmen qamtamasyz etýde.
QR Aýyl sharýashylyǵy mınıstriniń jumys sapary Baızaq aýdanynda jalǵasyp, «Jambyl oblysy turǵyndarynyń turmystyq tabysyn arttyrý» pılottyq jobasynyń oń nátıjelerine qanyqty. Máselen, «Qostóbe-2019» aýyl sharýashylyq óndiristik kooperatıvi pılottyq joba aıasynda qurylǵan.
Joba nátıjesinde pılottyq aýyldyq okrýgterdegi aýyl sharýashylyǵy tehnıkalary 36 paıyzǵa jańartylǵan. Óńirde jeke kásipkerler sany 2 282-ge artty. 589 jańa jumys orny ashyldy. Jobaǵa engen okrýgterdegi ataýly áleýmettik kómek alýshylar sany 1 058 otbasyǵa nemese 65 paıyzǵa azaıdy.
Sondaı-aq, mınıstr «Grand Fýds» JShS-niń kókónis qoımasymen tanysty. Qazirgi tańda oblys boıynsha 236 kókónis saqtaý qoımasy jumys isteýde.
T.Rysqulov aýdany Órnek aýyldyq okrýginde «Aýyl – El besigi» jobasynyń oblysta iske asyrylý barysy boıynsha kóshpeli keńes ótti. Jıynǵa aımaq basshysy Berdibek Saparbaev, QR aýyl sharýashylyǵy mınıstri Erbol Qarashókeev jáne aýdan ákimderi men basqarma basshylary qatysty.
«Bul joba aýyldardyń turaqty damýyna əser etedi. 2019-2020 jyldary aýyldyq eldi mekenderde quny 74,4 mlrd teńgeni quraıtyn 1010 joba iske asty. «Aýyl - el besigi» aıasynda 7 aýdannyń 29 eldi-mekeninde 10,3 mlrd teńgege 200-den asa joba oryndaldy. Bıyl osy joba aıasynda 10 aýdannyń 67 aýyldyq eldi mekeninde 8,7 mlrd teńgege 119 jobanyń 64-i paıdalanýǵa berildi, 405 jumys oryndary quryldy»,- degen oblys ákimi bul baǵdarlama aýyldaǵy máselelerdi sheshýge, aýyl adamdaryn jumysqa tartýǵa úlken múmkindik beretinin atap ótti.
Erbol Qarashókeev respýblıka boıynsha 3,5 myńnan asa prespektıvaly eldi meken anyqtalǵanyn, onda halyqtyń basym bóligi turatynyn aıtty.
«Bul baǵdaralamaǵa 618 mıllıard teńge bólinip, 12 myńnan astam joba júzege asyryldy. «Aýyl - el besigi» baǵdarlamasy aldaǵy 5 jylda óz jalǵasyn tabady»,- dedi mınıstr.
