Aýyl – el besigi: Túrkistan oblysynda bıyl 105 eldimeken jańarady

TÚRKІSTAN. QazAqparat - Bıyl Túrkistan oblysynda «Aýyl – el besigi» jobasy aıasynda 105 eldi mekende áleýmettik jáne ınfraqurylymdyq jobalar iske asady. Túrkistan oblysyna jumys sapary barysynda ulttyq ekonomıka vıtse-mınıstri Baýyrjan Omarbekov «Aýyl – el besigi» baǵdarlamasy sheńberinde iske asyrylyp jatqan jobalarmen tanysty.

Ulttyq ekonomıka mınıstrliginiń málimetinshe, bul maqsatqa bıyl respýblıkalyq bıýdjetten 16,4 mlrd teńge bólingen.

105 aýyldyq eldi mekende áleýmettik jáne ınjenerlik ınfraqurylymdy jańǵyrtýǵa baǵyttalǵan 249 joba júzege asyp jatyr.

Solardyń qatarynda Báıdibek aýdany Aǵybet eldi mekeninde Esirkep batyr atyndaǵy jalpy orta mektebi men dene shynyqtyrý-saýyqtyrý kesheniniń kúrdeli jóndeý jumystary da bar.

Báıdibek aýdany ákiminiń orynbasary Baǵdatbek Janǵazıev «Aýyl – el besigi» jobasy aıasynda eki mektepke júrgizilip jatqan jóndeý, eki eldi mekendi gazdandyrý, 6 kósheni jóndeý jumystary týraly aıtyp berdi.

Sondaı-aq, ulttyq ekonomıka vıtse-mınıstri Ordabasy aýdany Tórtkól aýylynda boldy.

Onda «Aýyl – el besigi» jobasy boıynsha dene shynyqtyrý-saýyqtyrý kesheniniń qurylysy jalǵasýda.

B.Omarbekov Aqbastaý aýyldyq okrýgi Jolǵabas eldi mekenindegi mektepke japsarjaı qurylys salý jumystarymen tanysyp, Aqbastaý aýylyndaǵy nysandardy aralady.

Jalpy, jumys sapary barysynda Túrkistan oblysynyń aýyldyq eldi mekenderin damytý boıynsha ózekti máseleler talqylandy.

Aýdan ákimderi aldaǵy kezeńdegi josparyn baıandady.

Sonymen qatar, jergilikti turǵyndarmen kezdesýler ótkizilip, aýyldaǵy problemalar kóterildi.

Aýdan ákimderine aýyl turǵyndarynyń kóterilgen máselelerin sheshý úshin birqatar usynystar berildi.