«Aýyl – El besigi»: Túrkistan oblysynda 86 eldi mekende qurylys jumystary yrǵaqty júrýde
TÚRKІSTAN. QazAqparat - «Aýyl – El besigi» jobasy aıasynda Túrkistan oblysynda 302 jobany iske asyrýǵa bıýdjetten jalpy 16,1 mlrd.teńge bólingen, dep habarlaıdy QazAqparat tilshisi.
Baǵdarlama aıasynda óńirde qosymsha 8 mektep salynyp, 10 mektep kúrdeli jóndeýden ótedi. Bir dárigerlik ambýlatorııa boı kóterip, 4 densaýlyq saqtaý nysany kúrdeli jóndeýmen qamtylýda. Sonymen birge 2 sport nysany, 2 mádenıet nysany, 15 tabıǵı gazben qamtamasyz etý jáne 13 elektr qýatymen jabdyqtaý nysany da josparǵa saı salynyp jatyr. 300-ge jýyq ishki kóshelerge ortasha jóndeý júrgizilýde.
Túrkistan oblysynyń strategııa jáne ekonomıkalyq damý basqarmasynyń basshysy Qanat Qaıypbek jobalardy iske asyrý barysynda 2 myńnan astam jumys orny qurylǵanyn atap ótti. Jyl sońyna deıin 291 nysandy paıdalanýǵa tapsyrý josparlansa, 25 nysan keler jylǵa ótpeli. Búgingi tańda 209 nysannyń jumystary aıaqtalyp, paıdalanýǵa berilgen.
Qalǵan nysandar kestege sáıkes jyl sońyna deıin tapsyrylady. Nátıjesinde jyl qorytyndysymen 86 eldi mekenge jańǵyrtý jumystary júrgiziledi.
