Aýyl – el besigi: Soltústik Qazaqstanda 32 joba júzege asyrylyp jatyr

PETROPAVL. QazAqparat – Soltústik Qazaqstan oblysynda 307 eldimeken bolashaǵy zor aýyldardyń qatarynda bolsa, bıyl 19 tirek eldimekende aýqymdy jobalar qolǵa alyndy, dep habarlaıdy QazAqparat tilshisi.

SQO-da 635 eldimeken bar. Sonyń jartysynan astamy bolashaǵy bar aýyldardyń qatarynda. ıAǵnı áleýeti joǵary, yńǵaıly ornalasqan, demografııalyq jaǵdaıy jaqsy.

«Aýyl – el besigi» baǵdarlamasy oblysta 2019 jyldan beri júzege asyp jatyr. Maqsaty - eldimekenderdi jańǵyrtý, aýyl turǵyndaryn áleýmettik ıgiliktermen qamtý, ınjenerlik-kommýnıkatsııalyq ınfraqurylymdy salý nemese jańǵyrtý.

Byltyr SQO-ǵa 1 mlrd 930 mln teńge bólinip, 21 joba júzege asyryldy. Onyń 19-y Saýmalkól eldimekeninde qatysty boldy. Keshendi damytý boıynsha Saýmalkól tańdap alyndy, eldimekenniń týrıstik áleýeti joǵary.

«Úsh mektep, emhananyń birinshi qabaty qalypqa keltirildi, jol ortasha jóndeldi. Ortalyqtan jylý berý úshin jeli men qazandyq qurylysy bastaldy. Eki qabatty ǵımarat óner mektebi retinde qaıta quryldy jáne dene shynyqtyrý-saýyqtyrý kesheniniń qurylysy bastaldy. Taǵy eki jobanyń biri Beskól aýylynda, bir shaqyrymnan astam jylý jelisi tartyldy. Talshyq aýylynda dene shynyqtyrý-saýyqtyrý kesheni salyndy. Nátıjesinde memlekettik baǵdarlama 26 myń adamdy qamtydy», - deıdi SQO ekonomıka basqarmasy aýyldyq aımaqtardy damytý bóliminiń jetekshisi Janar Ahmıeva.

Bıyl bul maqsatqa 5 mlrd teńgeden astam qarajat bólingen. Oǵan 19 tirek eldimekende 32 joba qolǵa alynǵan. Qazirgi tańda tórt joba aıaqtalsa, jeteýi bitýge jaqyn. Nátıjesinde 73 myńnan astam adamnyń ómir súrý deńgeıi jaqsarmaq.

«Keler jylǵa jospar bar. 12 tirek eldimeken negizge alynady. Aldyn ala osy maqsatqa qarajat bólinip otyr. Osylaısha, taǵy 32 myń aýyl turǵynyn qamtımyz», - deıdi Janar Ahmıeva.