«Aýyl – el besigi»: SQO-da 2025 jylǵa deıin 300-den astam aýyl jańǵyrtylady

PETROPAVL. QazAqparat - Búgin QR Tótenshe jaǵdaılar mınıstri ıÝrıı Ilın Premer-Mınıstr Asqar Mamınniń tapsyrmasy boıynsha «Aýyl – el besigi» jobasynyń júzege asyrylý barysymen tanysý maqsatynda Soltústik Qazaqstan oblysyna jumys saparymen bardy, dep habarlaıdy QazAqparat.

Sapar barysynda mınıstr Aqqaıyń aýdanynda «Aýyl – el besigi» baǵdarlamasy boıynsha jóndelgen jáne salynyp jatqan nysandardy aralady. ıÝrıı Ilın Aralaǵash orta mektebinde, Lenınskoe aýylyndaǵy mádenıet úıinde, Smırnovodaǵy mádenı-saýyqtyrý ortalyǵynda boldy. Sondaı-aq aýdan ortalyǵyndaǵy dene shynyqtyrý-saýyqtyrý kesheniniń qurylysymen tanysty. Sapar sońynda «Aýyl – el besigi» jobasyn júzege asyrý barysy talqylanǵan jıyn ótti.

Jobanyń basty maqsaty – aýyl ómiriniń sapasyn jaqsartý, aýyl ınfraqurylymyn jańǵyrtý. 2019-2020 jyldary 20 aýylda 6,6 mıllıard teńgege 44 joba júzege asyryldy. 76 myń adamǵa qolaıly jaǵdaı jasalyp, 550 jumys orny ashyldy. 2021 jyly 50 aýyldy damytýǵa 10,7 mlrd teńge bólindi. Aýyldarda mektepter, emhanalar, mádenıet úıleri, balabaqshalar jańǵyrtylyp, joldar jóndeldi, sporttyq nysandar boı kóterýde.

Jalpy, «Aýyl – el besigi» jobasy aıasynda Soltústik Qazaqstan oblysynda 2021 - 2025 jyldary 300-den astam aýyldy jańǵyrtý jumystary júrgiziledi. Osy kezeńde jalpy quny 43 mlrd teńge bolatyn 500-den astam jobany júzege asyrý josparlanýda, bul 244 myńnan astam adamnyń ómir súrý sapasyn jaqsartýǵa múmkindik beredi.