Aýyl – el besigi: ShQO-da 75 joba júzege asyryldy

ÓSKEMEN. QazAqparat – Shyǵys Qazaqstan oblysynda «Aýyl – el besigi» baǵdarlamasy aıasynda 75 joba júzege asyrylǵan, dep habarlaıdy QazAqparat tilshisi.

Búgin aımaq basshysy Danıal Ahmetov qala jáne aýdan ákimderimen «Aýyl –el besigi» baǵdarlamasynyń iske asyrylýy boıynsha jınalys ótkizdi.

«Bul baǵdarlamaǵa oblystyń 116 tirek aýyly kiredi. Qazirgi ýaqytta 44 eldi mekende 75 joba aıaqtaldy. Taǵy altaýy jyl sońyna deıin jáne 12-si 2022 jyly júzege asyrylmaq. Onyń ishinde dene shynyqtyrý-saýyqtyrý keshenderi, basseınder, mádenıet úıleri qurylysy, mektepterdi jóndeý jobalary bar. Ókinishke qaraı, keı aýdandarda jumystardyń atqarylý merzimi uzaqqa sozylyp ketken», - dedi ShQO ákimi.

Oǵan qurylys materıaldarynyń qymbattaýy, konkýrstardyń kesh ótkizilýi syndy máseleler sebep bolǵan.

«Biraq jobalardyń iske asyrylýy birinshi kezekte ákimderdiń jaýapkershiliginde ekendigin eskertemin. Osy rette, týyndaǵan máselelerdiń barlyǵyn qarastyratyn, sapaly taldaý júrgizetin komıssııa qurýdy tapsyrdym. Kóptegen aýylda biz dene shynyqtyrý-saýyqtyrý keshenderin salyp jatyrmyz. Biraq muny demografııalyq jaǵdaıdy, balalar sanyn eskere otyryp isteý kerek. Búginde óńirde balalar buqaralyq sportyn damytýǵa úlken kóńil bólinýde. 7000 tegin sektsııa jumys isteıdi. Aýyldyq jerlerde jattyqtyrýshylar sany artyp keledi», - dedi Danıal Ahmetov.