«Aýyl-el besigi»: Shardarada 21 kóshe jóndelmek

ShARDARA. QazAqparat – Túrkistan oblysy, Shardara qalasyndaǵy uzyndyǵy 12 shaqyrymdy quraıtyn 6 kóshe jergilikti bıýdjet esebinen jóndeldi, dep habarlaıdy QazAqparat tilshisi.

Sondaı-aq, «Aýyl-el besigi» baǵdarlamasy aıasynda respýblıkalyq bıýdjet qarjysy esebinen 465 mln teńge bólinip, 21 kósheni qalpyna keltirý jumystary josparlanǵan. Aýdan ákimdiginiń málimetinshe, aǵymdaǵy jyly Alataý batyr jáne Kóksý aýyldyq okrýgterindegi jóndelgen kósheler jýyq arada paıdalanýǵa berilmek. Al, Shardara qalasynyń ortalyǵyndaǵy 20 shaqyrym kósheler tazalanyp, jolaqtar syzylǵan. Sondaı-aq, jol belgileri men jasandy ótkelder ornatý jumystary júrgizilýde. Eldi mekenderdi gazdandyrý boıynsha jumystar 4 kezeńge bólinip, kezeń-kezeńmen júzege asyrylmaq. Búginde eki myńnan astam halqy bar 25 eldimekenniń jeteýi tabıǵı gazǵa qosylǵan.

Byltyr 5 aýyldyń jáne «Shardara» № 18 GTS-nyń qurylysy aıaqtalyp, paıdalanýǵa berilgen bolatyn. Nátıjesinde 13 407 otbasy, ıaǵnı, aýdan turǵyndarynyń 34 paıyzy gazben qamtylady. Odan bólek, Kóksý men Qosseıit aýyldaryn tabıǵı gazǵa qosý kútilýde. Aýdan ortalyǵyndaǵy Aqberdi eldi mekeni aýmaǵynan № 18 «Shardara» gaz taratý stansasy salyndy. Osy joba aıasynda Shardara qalasy jáne qalamen irgeles ornalasqan 11 eldi mekendegi 44 120 adamdy (aýdan turǵyndarynyń 55,7 paıyzy) kógildir otynǵa qosylatyn bolady.