«Aýyl – el besigi»: Ordabasyda jańa sport kesheni ashyldy

TÚRKІSTAN. QazAqparat – Túrkistan oblysy, Ordabasy aýdany Tórtkól aýyldyq okrýginde «Aýyl – el besigi» jobasy aıasynda zamanaýı sport kesheni el ıgiligine paıdalanýǵa berildi, dep habarlaıdy QazAqparat tilshisi.

Jańa nysannyń lentasyn qıǵan Ordabasy aýdanynyń ákimi Baǵlan Batyrshaev aýyl turǵyndaryn Táýelsizdik kúnimen quttyqtady.

Merekelik jıynda sport ardageri Asan Jumabaev táýelsizdik jyldarynda memleket tarapynan aýyldarǵa áleýmettik kómektiń kóptep kórsetilip jatqandyǵyna toqtaldy. Mamyr aıynda bastalǵan qurylys Táýelsizdik merekesi qarsańynda aıaqtaldy.

Sport kesheninde vorkaýtpen aınalysýǵa arnalǵan, sondaı-aq fýtbol, shaǵyn fýtbol, basketbol, voleıbolǵa arnalǵan alańdar bar. Budan bólek, erkin kúres, grek-rım kúresi, sambo, dzıýdo, boks boıynsha kúndelikti jattyǵýlar ótkiziletin zalmen qatar qol doby, ústel tennısi, basketbol, voleıbol syndy komandalyq oıyndardy oınaýǵa múmkindik qarastyrylǵan.