Aýyl - el besigi: Qyzylorda oblysynda 3 jylda 173 joba júzege asyryldy
Búgin QR Eńbek jáne halyqty áleýmettik qorǵaý mınıstri Serik Shápkenov Qyzylorda oblysyna jumys saparymen kelip, «Aýyl - el besigi» baǵdarlamasy aıasynda iske asyrylǵan jobalarmen tanysty.
Oblys ákimi Gúlshara Ábdiqalyqova mınıstrge joba aıasynda damý áleýeti joǵary aýyldyq eldi mekenderdiń áleýmettik jáne ınjenerlik ınfraqurylymyn jetildirý baǵytynda atqarylǵan jumystar barysyn baıandady. Sol arqyly oblysta 103 perspektıvaly aýyl naqtylandy. Bul baǵytta 82 joba qolǵa alynyp, 53 tirek aýyl jáne 50 spýtnık eldi meken aıqyndalǵan.
Aldymen mınıstr Syrdarııa aýdanynyń ortalyǵy Tereńózek kentindegi baǵdarlama aıasynda jóndeýden ótip jatqan A.Imanov kóshesindegi jumystardy kórdi. Kósheniń uzyndyǵy - 1,56 shaqyrym. Jaıaý júrginshiler joly, bordıýr jáne 3 shaqyrymǵa jetetin sýaǵar qosa salynýda. Qurylys tamyz aıynda bastalǵan. Ol qarashada aıaqtalady dep josparlanýda.
Aýdanda baǵdarlama aıasynda qolǵa alynǵan jobanyń biri – ortalyq stadıonǵa kúrdeli jóndeý. Bul nysan jyl aıaǵyna deıin qoldanysqa beriledi dep kútilýde. Alańdy jóndeý barysynda 7,5 myń sharshy metrge jasandy kógal tóseý qarastyrylǵan.
Jalaǵash aýdanyna qarasty Tań aýylynda da atqarylǵan jumystar barshylyq. Bıyl aýylda 11 joba iske asýda. Sonyń biri – Orynbaı jyraý kóshesindegi jóndeý barysynda uzyndyǵy bir shaqyrymnan asatyn dańǵyl jol zamanaýı talaptarǵa saı tóselgen. Osy eldi mekendegi №118 orta mektebiniń esik-terezeleri, edeni tolyq aýystyrylǵan. Syrtqy qabyrǵasy metall saıdıngpen qaptalyp, sý, káriz júıeleri, elektr jelileri jańartylǵan. Sondaı-aq, aýyldaǵy dárigerlik ambýlatorııa men ortalyq alańdy jańǵyrtý, Jalaǵash kentindegi 200 oryndyq oqýshylar úıi men 50 oryndyq óner mektebiniń qurylysy jyl sońynda paıdalanýǵa beriledi.
Aıta keteıik, aýdanda «Tań LTD» JShS dırektory Imamzada Shaǵyrtaev aýyl halqyna meshit ǵımaratyn jóndeý, bóbekjaıdy qaıta jańǵyrtý, sport keshenin salý, et óndeý tsehynyń qurylysyn salý, okrýgtegi kóshelerdi jaryqtandyrý isin óz qarajaty esebinen júrgizip, aýylǵa qomaqty ınvestıtsııa salǵan.
Mınıstr atalǵan memlekettik baǵdarlamanyń oblysta oryndalýy jónindegi arnaıy otyrysqa qatysty.
«Úkimet basshysynyń tapsyrmasyna sáıkes «Aýyl - el besigi» baǵdarlamasynyń oryndalý barysyna nazar aýdaryp kelemiz. Osy baǵytta Qyzylorda oblysynda joldardy kúrdeli jóndeý, dárigerlik ambýlatorııa men oqýshylarǵa arnalǵan mektepter salý eldi mekenderdegi turǵyndardyń jaǵdaıyn jaqsartý baǵytynda atqarylyp jatqan jumystar az emes. Sapar barysynda Qyzylorda oblysyndaǵy memlekettik baǵdarlamadan bólek, jergilikti jeke kásipkerlerdiń aýyl ómirin jaqsartýdaǵy bastamalaryn kórdim. Bul – óte quptarlyq nárse. Máselen, Tań aýylynda janashyr azamattar óz qarajatyn aýyldy kórkeıtýde jaqsy tájirıbeni iske asyryp keledi. Aldaǵy ýaqytta mundaı kásipkerlerge memlekettik deńgeıde qoldaý kórsetýdiń tetikterin qarastyrýdy usynamyz», - dedi mınıstr Serik Shápkenov.
Jıynda Gúlshara Ábdiqalyqova jobalardy qarjylandyrý jospary boıynsha ıgerý máselesin kóterdi. Qurylys jumystarynyń ýaqytyly ári sapaly júrgizilýi merdiger kompanııanyń jaýapkershiliginde ekenin atap ótti. Jyl aıaǵyna deıin bul baǵytta birqatar joba aıaqtalady.
Atap ótý kerek, buǵan deıin oblys ákimi Gúlshara Ábdiqalyqova tirek aýyldar jelisin arttyryp, týǵan eldi kórkeıtýge úles qosyp júrgen kásipkerlerge memlekettik baǵdarlamadan bólek, aýyldy damytýdy kózdeıtin jańa bastamalardy qoldaýǵa shaqyrǵan bolatyn. Sonyń nátıjesinde óńirde óz qarajatyna aýyldyń ınfraqurylymyn jaqsartyp, áleýmettik nysandaryn jańartýǵa úles qosyp júrgen kásipkerler qatary artty.
Eske salaıyq, atalǵan baǵdarlama boıynsha 3 jyl ishinde oblysta quny 11 mıllıard teńgeden asatyn 173 ınvestıtsııalyq joba júzege asyryldy. 2019 jyly 31 joba arqyly 54 adam jumyspen qamtylsa, 2020 jyly óńirdiń 8 eldi mekeninde quny 4,2 mıllıard teńgeni quraıtyn 60 joba iske asqan. Nátıjesinde 2019-2020 jyldary ataǵan baǵdarlama boıynsha 955 jańa kásipkerlik nysany ashylyp, jumyssyzdyq deńgeıi 5 paıyzǵa qysqardy.
Eske salsaq, budan buryn «Rýhanı jańǵyrý» baǵdarlamasy boıynsha Qyzylorda oblysynyń tájirıbesi óńirlerge tanystyryldy.
